Aamir Khan: అందుకే అవార్డు వేడుకలకు హాజరుకాను: ఆమిర్‌ ఖాన్‌

ఇంటర్నెట్‌ డెస్క్‌: బాలీవుడ్‌ స్టార్‌ హీరో ఆమిర్‌ఖాన్‌ (Aamir Khan) తాను అవార్డు వేడుకలకు హాజరుకాకపోవడానికి గల కారణాన్ని తెలిపారు. మొదటిసారి కపిల్‌శర్మ కార్యక్రమానికి వచ్చిన ఆయన తన చిత్రాల ఫలితాలపై స్పందించారు.

‘నా గత చిత్రాలు రెండూ ప్రేక్షకాదరణ పొందలేకపోయాయి. ‘లాల్‌ సింగ్‌ చడ్డా’, ‘థగ్స్‌ ఆఫ్‌ హిందుస్థాన్‌’ రెండూ విజయం సాధిస్తాయని ఆశించాను. వీటికి నేను ఎమోషనల్‌గా కనెక్ట్‌ అయ్యాను. అవి అంచనాలను అందుకోకపోవడంతో మానసికంగా బాధ పడ్డాను. అందుకే కోలుకోవడానికి సమయం పట్టింది. ఇండస్ట్రీలో జరిగే అవార్డు వేడుకలకు హాజరుకావడం నాకు ఆసక్తి ఉండదు. పైగా సమయం చాలా విలువైనది. దాన్ని ఆలోచించి సద్వినియోగం చేసుకోవాలి’ అని చెప్పారు. ఆమిర్‌ఖాన్‌ కెరీర్‌ ప్రారంభంలో నటించిన ‘ఖయామత్‌ సే ఖయామత్‌ తక్‌’ చిత్రంలోని పాటను తాజాగా ‘శ్రీకాంత్’లో రీమేక్‌ చేశారు. దీనిగురించి ఆయన మాట్లాడుతూ.. ‘నా జీవితాన్ని మలుపుతిప్పిన సినిమాలోని గీతమిది. ఈ ప్రాజెక్టు తొలినాళ్లలో మేమంతా ఇండస్ట్రీకి కొత్తవాళ్లం. నేను, దర్శకుడు మన్సూర్‌ ఎప్పుడూ సినిమాలో లోపాలను మాత్రమే వెతికేవాళ్లం. ఇంకా మెరుగ్గా సన్నివేశాల్ని ఎలా తీర్చిదిద్దాలి అనే చర్చించేవాళ్లం. ప్రేక్షకులు దీన్ని ఎలా స్వీకరిస్తారోనని భయంగా ఉండేది. కానీ.. మర్చిపోలేని బహుమతి ఇస్తుందని ఊహించలేదు. నా జీవితంలో ఎప్పటికీ ఒక మైలు రాయిలాంటి చిత్రమిది’ అని చెప్పారు.

ఆమిర్‌ఖాన్‌ ‘లాహోర్‌: 1947’లో నటించేందుకు సిద్ధమయ్యారు. రాజ్‌కుమార్‌ సంతోషి దర్శకత్వంలో ఇది తెరకెక్కనుంది. ఇందులో సన్నీదేవోల్‌ కీలకపాత్రలో కనిపించనున్నారు. త్వరలోనే ఈ చిత్రం సెట్స్‌పైకి వెళ్లనుంది.