Chiranjeevi: ఇప్పుడు బెంగళూరులో.. రేపు ఎక్కడైనా: నీటి విలువపై చిరంజీవి పోస్ట్‌

ఇంటర్నెట్‌ డెస్క్‌: కర్ణాటక రాజధాని బెంగళూరులో నీటి సమస్య (Bengaluru Water Crisis) తలెత్తిన సంగతి తెలిసిందే. దాదాపు నాలుగు దశాబ్దాల్లో ఎన్నడూ ఎరుగని జల సంక్షోభాన్ని అక్కడి వాసులు ఎదుర్కొంటున్నారు. ఈ క్రమంలోనే నీటి విలువను గుర్తుచేస్తూ ప్రముఖ హీరో చిరంజీవి (Chiranjeevi) సోషల్‌ మీడియా వేదికగా పోస్ట్‌ చేశారు. నీటి సంరక్షణ (Conserve Water)ను దృష్టిలో పెట్టుకుని ఇంకుడు గుంతలు, చిన్నపాటి బావులు ఉండేలా ఇంటిని నిర్మించుకోవాలని పేర్కొన్నారు. బెంగళూరులోని తన ఫామ్‌హౌస్‌లోనూ అటువంటి నిర్మాణాలు చేపట్టినట్లు తెలిపారు. సంబంధిత ఫొటోలు షేర్‌ చేశారు.

‘‘నీరు జీవనాధారం. నీటి కొరత వల్ల రోజువారీ జీవితం కష్టతరమవుతుంది. ప్రస్తుతం ఆ పరిస్థితి బెంగళూరులో నెలకొంది. రేపు ఇంకెక్కడైనా రావొచ్చు. అందుకే నీటి సంరక్షణకు ప్రాధాన్యమిస్తూ ఇంటిని నిర్మించుకోవాల్సిన అవసరం ఉంది. నా ఫామ్‌హౌజ్‌లో పెర్మాకల్చర్‌ విధానాన్ని అమలు చేస్తున్నా’’ అని పేర్కొన్నారు.