Adipurush: ‘ఆదిపురుష్‌’ డైలాగ్స్‌.. ఆనాటి లక్ష్మణుడి పాత్రధారి ఆగ్రహం

ఇంటర్నెట్‌డెస్క్‌: రామానంద్‌ సాగర్‌ తెరకెక్కించిన ‘రామాయణ్‌’ ధారావాహికలో లక్ష్మణుడిగా నటించి ఆనాడు ప్రశంసలు అందుకున్న నటుడు సునీల్‌ లహ్రీ (Sunil Lahri)  ‘ఆదిపురుష్‌’పై ఆగ్రహం వ్యక్తం చేశారు. ‘ఆదిపురుష్‌’ (Adipurush) టీజర్‌ విడుదలైన నాటి నుంచి తటస్థంగా మాట్లాడిన ఆయన.. తాజాగా సినిమాలో ఉపయోగించిన భాషను తప్పుబడుతూ పోస్ట్‌ పెట్టారు. ఈ మేరకు సినిమాలోని పలు సన్నివేశాల్లో హనుమంతుడి, రావణాసురుడి డైలాగ్స్‌ను కోట్‌ చేస్తూ.. ‘‘రామాయణాన్ని ఆధారంగా చేసుకునే ‘ఆదిపురుష్‌’ తెరకెక్కిస్తున్నామని చెప్పిన వాళ్లు ఇలాంటి సంభాషణలు ఉపయోగించడం నిజంగా సిగ్గుచేటు’’ అని అన్నారు.

‘ఆదిపురుష్‌’లోని డైలాగ్స్‌పై ప్రస్తుతం నెట్టింట చర్చ జరుగుతోంది. హిందీ వెర్షన్‌లోని కొన్ని సంభాషణలు మర్యాదపూర్వకంగా లేవంటూ ఇప్పటికే పలువురు నెటిజన్లు, రాజకీయ ప్రముఖులు ఆగ్రహం వ్యక్తం చేశారు. అలాంటి సంభాషణలు ఎలా ఉపయోగించారంటూ మండిపడ్డారు. ఇదే విషయంపై చిత్ర డైలాగ్‌ రైటర్‌ మనోజ్ ముంతాషిర్ శుక్లా స్పందించారు. తాను ఎంతో శ్రద్ధ పెట్టి డైలాగ్స్‌ రాసినట్లు చెప్పారు. పాత్రల మధ్య వ్యత్యాసం చూపించడం కోసమే డైలాగ్స్‌ను సరళీకరించానన్నారు.