Ahimsa: సైలెంట్‌గా ఓటీటీలోకి ‘అహింస’.. స్ట్రీమింగ్‌ ఎక్కడంటే!

ఇంటర్నెట్‌ డెస్క్‌: దగ్గుబాటి అభిరామ్‌ హీరోగా దర్శకుడు తేజ తెరకెక్కించిన చిత్రం ‘అహింస’. జూన్‌ 6న ప్రేక్షకుల ముందుకు వచ్చిన ఈ సినిమా మెప్పించలేకపోయింది. తాజాగా ఈ చిత్రం సైలెంట్‌గా ఓటీటీలోకి వచ్చేసింది. అమెజాన్‌ ప్రైమ్‌ (Amazon prime) వేదికగా ప్రసారమవుతోంది. ఇందులో గీతికా తివారీ కథానాయికగా నటించగా..  రజత్‌ బేడీ, సదా, రవి కాలే, కమల్‌ కామరాజు తదితరులు కీలకపాత్రలు పోషించారు. ఆర్పీ పట్నాయక్‌ సంగీతం అందించారు.

కథేంటంటే: రఘు (అభిరామ్‌ దగ్గుబాటి), అహల్య (గీతికా తివారీ) బావామరదళ్లు. ఒకరంటే ఒకరికి ప్రాణం. ఇద్దరికీ నిశ్చితార్థం కూడా జరుగుతుంది. అదే రోజు అహల్యపై అత్యాచారం చోటు చేసుకుంటుంది. దీంతో ఆ అఘాయిత్యానికి పాల్పడిన వారిపై న్యాయ పోరాటానికి దిగుతాడు రఘు. అతడికి న్యాయవాది లక్ష్మి (సదా) అండగా నిలుస్తుంది. మరి ఈ పోరాటంలో ఎలాంటి మలుపులు చోటుచేసుకున్నాయి. చివరికి గెలుపు ఎవరిది? అహింసావాదాన్ని నమ్మే రఘు ఈ పోరాటంలో విజయం సాధించాడా? లేదా? అనేది కథ.