Bade Miyan Chote Miyan: కెరీర్‌లో వరుసగా 16 ఫ్లాప్‌లు చూశా: అక్షయ్‌ కుమార్‌

ఇంటర్నెట్‌ డెస్క్‌: బాలీవుడ్ కథానాయకులు అక్షయ్‌ కుమార్‌ (Akshay Kumar), టైగర్‌ ష్రాఫ్‌ (Tiger Shroff) ప్రధాన పాత్రల్లో నటిస్తున్న చిత్రం ‘బడేమియా ఛోటేమియా’ (Bade Miyan Chote Miyan). దేశభక్తి నేపథ్యంలో యాక్షన్‌ థ్రిల్లర్‌గా అలీ అబ్బాస్‌ జాఫర్ దీనిని తెరకెక్కిస్తున్నారు. పృథ్వీరాజ్‌ సుకుమారన్‌ ప్రతినాయకుడిగా కనిపించనున్నారు. మానుషి చిల్లర్‌, అలయా ఎఫ్‌, సోనాక్షి సిన్హా తదితరులు కీలక పాత్రల్లో నటిస్తున్నారు. ఏప్రిల్‌ 10న ఈ సినిమా ప్రేక్షకుల ముందుకు రానుంది. తాజాగా ఈ చిత్రానికి సంబంధించిన ట్రైలర్‌ను విడుదల చేశారు. ఈ వేడుకలో అక్షయ్‌ కుమార్‌ మాట్లాడారు.

‘‘మేమందరం సినిమాలు చేస్తాం కానీ, ఫలితాన్ని నిర్ణయించలేం. అది ఆడియన్స్‌ అభిప్రాయం పై ఆధారపడి ఉంటుంది. నా కెరీర్‌లో వరుసగా 16 ఫ్లాప్‌లు చూశాను. సక్సెస్‌ అయినా లేకున్నా ప్రేక్షకుల్ని అలరించేందుకు ప్రయత్నిస్తూనే ఉన్నాను. ఎప్పుడూ విభిన్నమైన కథలను ఎంపిక చేసుకునేందుకు ఆసక్తి చూపిస్తాను. ఈ మధ్యన నేను కామెడీ చిత్రాలకు ప్రాధాన్యత ఇస్తున్నాని అంటున్నారు. అలాంటిదేం లేదు. కథ నచ్చితే సినిమా చేస్తాను. ఒకే జోనర్‌లో సినిమాలు చేయడం నాకు అంతగా ఇష్టం ఉండదు. ఎప్పుడూ కొత్తగా ఆలోచిస్తాను. కామెడీ, యాక్షన్‌, రొమాంటిక్‌ వంటి అన్ని జోనర్‌ చిత్రాల్లోనూ నటిస్తాను. ‘బడేమియా ఛోటేమియా’ కోసం చాలా కష్టపడ్డాం. ఈ సినిమాను ప్రేక్షకులు ఆదరిస్తారని, విజయం సాధిస్తుందని ఆశిస్తున్నాం’’ అని అక్షయ్‌ కుమార్‌ తెలిపారు.