Allu Aravind: త్వరలోనే కాంగ్రెస్‌ ప్రభుత్వ పెద్దలను కలుస్తాం: అల్లు అరవింద్‌

హైదరాబాద్‌: తెలంగాణలో జరిగిన అసెంబ్లీ ఎన్నికల్లో కాంగ్రెస్ పార్టీ విజయం సాధించడం పట్ల టాలీవుడ్‌ ప్రముఖ నిర్మాత అల్లు అరవింద్ (Allu Aravind) స్పందించారు. కాంగ్రెస్‌ విజయాన్ని స్వాగతిస్తున్నట్లు చెప్పారు. హైదరాబాద్‌లోని ప్రసాద్‌ ప్రివ్యూ థియేటర్‌లో జరిగిన ఓ కార్యక్రమంలో పాల్గొన్న ఆయన ఈ మేరకు మాట్లాడారు. సినీ పరిశ్రమ తరఫున త్వరలోనే కాంగ్రెస్ ప్రభుత్వ పెద్దలను కలుస్తామన్నారు. గత ప్రభుత్వాలు సినీ పరిశ్రమను ఎంతో ప్రోత్సహించాయని, కాంగ్రెస్‌ కూడా అదే విధంగా చిత్ర పరిశ్రమకు అండగా ఉంటుందన్న ఆశాభావం వ్యక్తం చేశారు.

నిర్మాతల మండలి శుభాకాంక్షలు..

తెలుగు చలన చిత్ర నిర్మాతల మండలి.. తెలంగాణ అసెంబ్లీ ఎన్నికల్లో గెలిచిన వారికి శుభాకాంక్షలు తెలిపింది. ఈ మేరకు ఓ ప్రకటన విడుదల చేసింది. కొడంగల్‌ నియోజకవర్గంలో విజయం సాధించిన రేవంత్ రెడ్డికి ప్రత్యేకంగా శుభాకాంక్షలు తెలిపింది.