Amitabh Bachchan: ఎంత వేగంగా గాయమైందో.. అలానే నయమవుతుంది: అమితాబ్‌

ముంబయి: స్టార్‌ హీరో అమితాబ్‌ బచ్చన్‌ (Amitabh Bachchan) సినిమా చిత్రీకరణలో ఇటీవల గాయపడిన సంగతి తెలిసిందే. ప్రస్తుతం ఆయన ఆ గాయం నుంచి కోలుకుంటున్నారు. ఈ మేరకు తన బ్లాగ్‌లో  స్ఫూర్తిమంతమైన నోట్‌ రాశారు. ‘‘ఇలాంటి సమయంలో ప్రతి మనిషికి రెండు ఛాయిస్‌లు ఉంటాయి. నాకు ఎందుకు ఇలా జరిగిందని విలపిస్తూ కూర్చోవడం.. రెండు ఎంత బాధ ఉన్నా దాన్ని అధిగమించడం. నేను ఎప్పుడూ రెండో మార్గాన్నే ఎంచుకుంటా. మన శరీరం గాయాన్ని తగ్గించే విధంగా తన పని తను చేస్తుంటుంది. ఎంత వేగంగా గాయమైందో.. అంతే వేగంగా నయమవుతుంది’’ అని తెలిపారు. అలాగే ప్రతి మనిషిలో లోపాలుంటాయని వాటిని అధిగమిస్తూ ముందుకు పోవాలని సూచించారు.

‘ప్రాజెక్ట్‌ కె’ (Project K) (వర్కింగ్‌ టైటిల్‌) చిత్రీకరణలో అమితాబ్‌ గాయపడిన సంగతి తెలిసిందే. హైదరాబాద్‌లో షూటింగ్‌ జరుగుతున్న సమయంలో ఆయన కుడివైపు పక్కటెముకలకు దెబ్బ తగిలింది. దీంతో ఆయన గత కొద్ది రోజులుగా ముంబయిలోని నివాసంలో విశ్రాంతి తీసుకుంటున్నారు. ప్రభాస్‌ (Prabhas) హీరోగా నాగ్‌ అశ్విన్‌ దర్శకత్వంలో తెరకెక్కుతోన్న చిత్రమిది. ప్రభాస్‌ సరసన దీపికా పదుకొణె (Deepika Padukone) నటిస్తోంది. వచ్చే ఏడాది సంక్రాతికి ఈ సినిమా ప్రేక్షకుల ముందుకు రానుంది.