Tantra: ‘తంత్ర’ ఓటీటీ రిలీజ్‌ డేట్‌ ఫిక్స్‌.. స్ట్రీమింగ్‌ ఎప్పుడంటే

ఇంటర్నెట్‌ డెస్క్‌: టాలీవుడ్‌ నటి అనన్య నాగళ్ల ప్రధాన పాత్రలో నటించిన హారర్‌ థ్రిల్లర్‌ ‘తంత్ర’. దర్శకుడు శ్రీనివాస్‌ గోపిశెట్టి ఈ సినిమాను తెరకెక్కించారు. సలోని, ధనుష్‌ రఘుముద్రి, వంశీ తదితరులు కీలక పాత్రల్లో నటించారు. మార్చి 15న థియేటర్‌లో విడుదలైన ఈ సినిమా ఓటీటీలో ప్రేక్షకులను అలరించేందుకు సిద్ధమైంది. ప్రముఖ ఓటీటీ ఫ్లాట్‌ఫాం ఆహాలో ఏప్రిల్‌ 5 నుంచి స్ట్రీమింగ్‌ కానుంది. ఈ విషయాన్ని చిత్రబృందం అధికారికంగా ప్రకటించింది.

కథేంటంటే: పల్లెటూరిలో జరిగే తాంత్రిక విద్యల నేపథ్యంలో ఈ చిత్రాన్ని తెరకెక్కించారు. చిన్నప్పుడే తల్లి రాజేశ్వరి (సలోని)ని పోగొట్టుకుని తండ్రి ఆదరణకు దూరమై నాన్నమ్మ వద్ద ఉంటుంది రేఖ(అనన్య). ఎవరిపై అయినా క్షుద్ర ప్రయోగాలు, చేతబడి చేసినా ఆ విషయం రేఖకు తెలుస్తుంది. ఆమెకు దెయ్యాలు కనిపిస్తాయి. ఆమెకు చిన్నప్పటి నుంచి పరిచయమున్న తేజ (ధనుష్‌ రఘుముద్రి)తో ఏర్పడిన స్నేహం ప్రేమగా మారుతుంది. సరదాగా సాగిపోతున్న వారి జీవితాల్లో మార్పులు చోటుచేసుకుంటాయి. వింతగా ప్రవర్తించడం మొదలు పెడుతుంది. దానిని గమనించిన తేజ ఆమెపై క్షుద్ర ప్రయోగం జరిగిందేమోనని సందేహపడతాడు. ఎప్పుడో ఆ ఊరి నుంచి వెళ్లిపోయిన విగతి (వంశీ) తిరిగి రావడంతో రేఖకు కష్టాలు ఎదురవుతాయి. రేఖ తల్లి ఎవరు? ఆమె గతం ఏంటి? ఆమెకి దెయ్యాలు ఎందుకు కనిపిస్తాయి? విగతితో ఉన్న విభేదాలేంటి? చివరికి కథ ఏ మలుపు తిరిగింది? తెలియాలంటే సినిమా చూడాల్సిందే.