War 2: ‘వార్‌-2’లో మరో తెలుగు నటుడు.. ఆ పాత్రలోనేనా!

ఇంటర్నెట్‌ డెస్క్‌: బాలీవుడ్‌ అగ్ర కథానాయకుడు హృతిక్‌ రోషన్‌ (Hrithik Roshan), టాలీవుడ్‌ స్టార్‌ హీరో ఎన్టీఆర్‌ ప్రధాన పాత్రల్లో నటిస్తోన్న చిత్రం ‘వార్‌ -2’. అయాన్‌ ముఖర్జీ దర్శకత్వంలో రానున్న ఈ స్పై థ్రిల్లర్‌ కోసం ప్రేక్షకులంతా ఆసక్తిగా ఎదురుచూస్తున్నారు. ఇప్పటికే దీనికి సంబంధించిన ఎన్నో వార్తలు సోషల్‌ మీడియాలో వైరల్‌ కాగా.. తాజాగా మరో న్యూస్‌ తెలుగు ఆడియన్స్‌ను ఆకర్షిస్తోంది.

ఈ భారీ యాక్షన్‌ సినిమాలో మరో తెలుగు నటుడు భాగమైనట్లు తెలుస్తోంది. సెకండ్‌ ఇన్నింగ్స్‌లో విలన్‌గా ఫుల్ బిజీగా మారిన జగపతి బాబు (Jagapathi Babu) ‘వార్‌-2’లో కీలకపాత్రలో కనిపించనున్నారట. ఎన్టీఆర్‌కు తండ్రిగా ఆయన నటించనున్నట్లు వార్తలు వస్తున్నాయి. స్టోరీకి ఈ పాత్ర మరింత పవర్‌ను ఇస్తుందంటున్నారు. దీనిపై అధికారిక ప్రకటన రావాల్సిఉంది. యశ్‌రాజ్‌ స్పై యూనివర్స్‌లో భాగంగా రూపొందుతున్న ఈ చిత్రంలో హృతిక్‌ రోషన్‌, ఎన్టీఆర్‌ల మధ్య యాక్షన్‌ సన్నివేశాలు హోరాహోరీగా ఉండనున్నాయి. దీని షూటింగ్‌ కూడా శరవేగంగా జరుగుతోంది. ఇందులో ఎన్టీఆర్‌ ఇండియన్‌ రా ఏజెంట్‌గా కనిపించనున్నట్లు సమాచారం. ‘దేవర’ షూటింగ్‌ పూర్తికాగానే ఎన్టీఆర్‌ ‘వార్‌-2’లో జాయిన్‌ కానున్నారు.

‘దేవర’ విషయానికొస్తే.. ఎన్టీఆర్‌(NTR), దర్శకుడు కొరటాల శివ(Koratala Siva) కాంబినేషన్‌లో యాక్షన్‌ డ్రామాగా రూపొందుతుంది. పాన్‌ ఇండియా స్థాయిలో రానున్న ఈ చిత్రంలో జాన్వీకపూర్‌ తెలుగు తెరకు పరిచయమవుతుండగా, సైఫ్‌ అలీఖాన్‌ ప్రతినాయకుడిగా నటిస్తున్నారు. కీలక పాత్రలో శ్రీకాంత్‌ కనిపించనున్నారు.