bootcut balaraju ott: ఓటీటీలో ‘బూట్‌కట్‌ బాలరాజు’.. స్ట్రీమింగ్‌ ఎక్కడంటే?

హైదరాబాద్‌: సొహెల్‌ హీరోగా శ్రీ కోనేటి తెరకెక్కించిన సినిమా ‘బూట్‌కట్‌ బాలరాజు’ (Bootcut Balaraju). మేఘ లేఖ కథానాయిక. సునీల్‌, ఇంద్రజ తదితరులు కీలక పాత్రలు పోషించారు. ఫిబ్రవరి 2న ప్రేక్షకుల ముందుకు వచ్చిన ఈ చిత్రం బాక్సాఫీస్‌ వద్ద మిశ్రమ స్పందనలకే పరిమితమైంది. విడుదలై నెలరోజులు కూడా కాకముందే ఓటీటీ ప్రేక్షకులను అలరించడానికి వచ్చేస్తోంది. తెలుగులో ఓటీటీ వేదిక ‘ఆహా’లో ఫిబ్రవరి 26వ తేదీ నుంచి అందుబాటులోకి రానుంది. ఈ విషయాన్ని తెలియజేస్తూ ఆహా కొత్త పోస్టర్‌ను పంచుకుంది. ‘‘మన ‘బూట్ కట్ బాలరాజు’ ఇక ఊరు, వాడ, పిల్లా, జల్లా అందరూ రెడీగా ఉండుర్రి’’ అని ట్వీట్ చేసింది.

ఇంతకీ కథేంటంటే: బాలరాజు (సొహైల్‌) ఊళ్లో సరదాగా తిరిగే కుర్రాడు. బాధ్యతలు అస్సలు తెలియవు. తండ్రి (సుమన్)కి ఇచ్చిన మాట కోసం పటేలమ్మ (ఇంద్రజ) తన భర్తను కూడా వదిలేసి ఊరి పెద్దగా మారుతుంది. ఆమె కూతురు మహాలక్ష్మి (మేఘలేఖ) అంటే ఊళ్లో అందరికీ గౌరవం, భయం. దీంతో ఎవరూ ఆమెతో స్నేహం చేసేవారు కాదు. అలాంటి సమయంలో బాలరాజు .. మహాలక్ష్మిని అందరితో సమానంగా చూస్తాడు. అలా వీరి మధ్య స్నేహం మొదలై ప్రేమగా మారుతుంది. మరి వీరి ప్రేమకు ఉన్న అడ్డంకి ఏంటి? ఈ క్రమంలో బాలరాజుకు ఎదురైన సవాళ్లను ఎలా ఎదుర్కొన్నాడు? తన ప్రేమను గెలిపించుకునేందుకు ఊరి ప్రజల మనసును ఎలా దోచుకున్నాడు? అన్నది మిగిలిన కథ.