Nani: తెలుగు రాష్ట్రాల బ్రిటిష్‌ డిప్యూటీ కమిషనర్‌తో నాని.. ఏం మాట్లాడారంటే!

ఇంటర్నెట్‌ డెస్క్‌: ఆంధ్రా, తెలంగాణకు బ్రిటిష్‌ డిప్యూటీ కమిషనర్‌గా వ్యవహరిస్తోన్న గారెత్‌ విన్‌ ఓవెన్‌ హీరో నానిని (Nani) కలిశారు. హైదరాబాద్‌లోని నాని నివాసానికి వెళ్లిన గారెత్‌ కొంత సమయం గడిపారు. ఈ విషయాన్ని తెలుపుతూ ఆయన ఎక్స్‌లో పోస్ట్‌ పెట్టారు. ‘నానితో సమయం గడపడం ఎంతో ఆనందంగా ఉంది. తన సినిమాలు, వ్యక్తిగత జీవితం గురించి తెలుసుకున్నా. తెలుగు చిత్ర పరిశ్రమతో బ్రిటన్‌ సంబంధాలు ఎలా బలోపేతం చేసుకోవచ్చో ఇద్దరం చర్చించుకున్నాం. ఆయన నటించిన ఏవైనా రెండు సినిమాలు చూడమని నాని కోరారు. ఏ చిత్రాలు చూడాలో నాకు చెప్పండి’ అంటూ నెటిజన్లను సలహా అడిగారు.

సినిమాల విషయానికొస్తే.. వరుస హిట్‌లతో ఫుల్‌ జోష్‌ మీద ఉన్నారు హీరో నాని. ప్రస్తుతం ‘సరిపోదా శనివారం’ (Saripodhaa Sanivaaram)లో నటిస్తున్నారు. వివేక్‌ ఆత్రేయ దర్శకత్వంలో ఇది తెరకెక్కనుంది. వీరిద్దరి కాంబినేషన్‌లో విభిన్నమైన కథతో తెరకెక్కుతున్న రెండో సినిమా ఇది. ఇందులో నాని మాస్‌లుక్‌లో కనిపించనున్నారు. ప్రియాంక అరుళ్‌ మోహన్‌ కథానాయిక. ఎస్.జె.సూర్య కీలకపాత్రలో నటిస్తున్నారు. పాన్‌ ఇండియా స్థాయిలో తెలుగు, కన్నడ, మలయాళ, హిందీ భాషల్లో ఆగస్టు 29న సినిమాను విడుదల చేసేందుకు సన్నాహాలు చేస్తున్నారు. మరోవైపు ‘బలగం’ సినిమాతో దర్శకుడుగా మంచి గుర్తింపు అందుకున్న వేణు దర్శకత్వంలోను నాని నటించనున్నట్లు టాక్‌.