Thangalaan: తంగలాన్‌... ఓ అద్భుత ప్రయాణం

సినిమాలలో భిన్నమైన పాత్రలను ఎంచుకుంటూ ప్రేక్షకులను ఆకట్టుకుంటారు ప్రముఖ కథానాయకుడు విక్రమ్‌ (Vikram). ఆయన ప్రధాన పాత్రలో నటిస్తున్న చిత్రం ‘తంగలాన్‌’ (Thangalaan). పా రంజిత్‌ ఈ చిత్రాన్ని తెరకెక్కిస్తున్నారు. ఇందులో విక్రమ్‌ గెటప్‌ గత చిత్రాలకు పూర్తి భిన్నంగా కొత్త తరహాలో ఉండనుంది. ఇప్పటికే ఈ సినిమాలో విక్రమ్‌కు సంబంధించిన చిత్రాలు విడుదలై ఆసక్తిని రేకెత్తించాయి. తాజాగా ఈ సినిమా చిత్రీకరణను పూర్తి చేసుకుంది. ఈ సందర్భంగా సెట్‌ నుంచి ఫొటోల్ని పంచుకున్నారు విక్రమ్‌. ‘‘తంగలాన్‌’ చిత్రీకరణ పూర్తి అయ్యింది. ఇది ఒక అద్భుతమైన ప్రయాణం. ఈ ప్రయాణంలో మంచి వ్యక్తులతో పనిచేశాను. ఒక నటుడిగా నాకు మంచి అనుభవాల్ని ఇచ్చింది. ఇలాంటి అవకాశం ఇచ్చిన దర్శకుడికి ధన్యవాదాలు’ అని వ్యాఖ్యల్ని జోడించారు. ఈ చిత్రంలో మాళవిక మోహన్‌, పార్వతి తిరువోతు కీలక పాత్రలు పోషిస్తున్నారు. కర్ణాటకలోని కోలార్‌ బంగారు గని కార్మికుల జీవితాల ఆధారంగా ఈ సినిమా రూపొందుతుంది.