NTR: ఆగస్టు నుంచి ఆరంభం

‘దేవర’ తర్వాత ఎన్టీఆర్‌ చేయనున్న కొత్త చిత్రంపై స్పష్టత వచ్చింది. ఆయన హీరోగా ప్రశాంత్‌ నీల్‌ దర్శకత్వంలో ఓ సినిమా రూపొందనున్న సంగతి తెలిసిందే. మైత్రీ మూవీ మేకర్స్, ఎన్టీఆర్‌ ఆర్ట్స్‌ సంస్థలు సంయుక్తంగా నిర్మిస్తున్నాయి. ఈ చిత్రమే ‘ఎన్టీఆర్‌ నీల్‌’ వర్కింగ్‌ టైటిల్‌తో ఆగస్టు నుంచి చిత్రీకరణను ప్రారంభించుకోనుంది. సోమవారం తారక్‌ పుట్టినరోజు సందర్భంగా ఈ విషయాన్ని చిత్ర నిర్మాణ సంస్థ ప్రకటించింది. ప్రశాంత్‌ ప్రస్తుతం ఈ చిత్ర స్క్రిప్ట్‌కు తుది మెరుగులు దిద్దుతున్నారని.. ఎన్టీఆర్‌కు ఉన్న మాస్‌ ఇమేజ్‌ను దృష్టిలో పెట్టుకుని ఓ శక్తిమంతమైన కథను, పాత్రను సిద్ధం చేస్తున్నారని.. ఇది కచ్చితంగా సినీప్రియుల అంచనాల్ని మించేలా ఉండనుందని చిత్ర నిర్మాతలు తెలిపారు. ప్రస్తుతం ఎన్టీఆర్‌ నటించిన ‘దేవర: పార్ట్‌ 1’ విడుదలకు సిద్ధమవుతుండగా.. ‘వార్‌ 2’ చిత్రీకరణ శరవేగంగా జరుగుతోంది.