Adipurush: ‘ఆదిపురుష్‌’పై సెహ్వాగ్‌ సెటైర్‌.. ‘బాహుబలి’ని ఉద్దేశిస్తూ ట్వీట్‌

ఇంటర్నెట్‌డెస్క్‌: ‘ఆదిపురుష్‌’ (Adipurush) చిత్రంపై తనదైన శైలిలో వ్యంగ్యాస్త్రాలు విసిరాడు మాజీ డ్యాషింగ్‌ ఓపెనర్‌ వీరేంద్ర సెహ్వాగ్‌ (Virender Sehwag). ‘‘ఆదిపురుష్‌’ చూసిన తర్వాత కట్టప్ప బాహుబలిని ఎందుకు చంపాడో అర్థమైంది’’ అంటూ ఆయన సెటైర్‌ వేశాడు. ప్రస్తుతం ఈ ట్వీట్‌ నెట్టింట వైరల్‌గా మారింది. దీనిని చూసిన పలువురు నెటిజన్లు భిన్నాభిప్రాయాలు వ్యక్తం చేస్తున్నారు. ఇక, ప్రభాస్‌ ఫ్యాన్స్‌ మాత్రం.. సినిమా చూడకుండానే సెహ్వాగ్‌ ఈ ట్వీట్‌ చేశాడని ఆగ్రహం వ్యక్తం చేస్తున్నారు.

భారతీయ ఇతిహాసాల్లో ఒకటైన రామాయణాన్ని ఆధారంగా చేసుకుని ఓంరౌత్‌ (Om Raut) ‘ఆదిపురుష్‌’ను తెరకెక్కించారు. రాఘవ పాత్రలో ప్రభాస్‌ (Prabhas).. జానకి పాత్రలో కృతిసనన్‌ (Kriti Sanon) నటించారు. రావణాసురుడిగా సైఫ్‌ అలీఖాన్‌ కనిపించారు. భారీ అంచనాల మధ్య జూన్‌ 16న ప్రపంచవ్యాప్తంగా విడుదలైన ఈ సినిమా తొలిరోజు నుంచి విమర్శలు ఎదుర్కొంటోంది. ముఖ్యంగా హనుమంతుడి డైలాగ్స్‌ విషయంలో అంతటా వివాదం నెలకొంది. ఓంరౌత్‌, మాటల రచయిత మనోజ్ ముంతాషిర్ శుక్లా, చిత్ర నిర్మాతలకు రామాయణంపై సరైన అవగాహన లేదని, ఈ సినిమానే దానికి నిదర్శనం అంటూ పలువురు బాలీవుడ్‌ సినీ ప్రముఖులు వ్యాఖ్యలు చేశారు. ఈ క్రమంలోనే చిత్రబృందం హనుమంతుడి డైలాగ్స్‌లో మార్పులు చేసింది.