Deadpool 3: ప్రపంచ రికార్డును సృష్టించిన ‘డెడ్‌పూల్‌ అండ్‌ వోల్వరైన్‌’ టీజర్‌

ఇంటర్నెట్‌డెస్క్‌: ‘డెడ్‌పూల్‌’.. అమెరికన్‌ సూపర్‌ హీరోల సినిమాలను చూసేవారికి పరిచయం అక్కర్లేని పేరు. 2016లో వచ్చిన ఈ చిత్రం బాక్సాఫీస్‌ వద్ద ఘన విజయాన్ని అందుకుంది. ఆ తర్వాత విడుదలైన ‘డెడ్‌పూల్‌-2’ కూడా అలరించింది. ఇప్పుడు ఈ సిరీస్‌ను కొనసాగిస్తూ రాబోతున్న మరో సరికొత్త సూపర్‌ హీరో యాక్షన్‌ ఫిల్మ్‌ ‘డెడ్‌ పూల్‌ అండ్‌ వోల్వరైన్‌’ (Deadpool & Wolverine). రేయాన్‌ రేనాల్డ్స్‌, హ్యూ జాన్‌మెన్‌ కీలక పాత్రల్లో నటిస్తున్న ఈ సినిమాను షాన్‌ లెవీ తెరకెక్కించారు. ఇప్పటికే చిత్రీకరణ పూర్తి చేసుకున్న ఈ మూవీ వేసవి కానుకగా జులై 26న ప్రేక్షకుల ముందుకు రానుంది. ఈ క్రమంలో విడుదల చేసిన టీజర్‌ రికార్డు వ్యూస్‌ సాధించింది. కేవలం 24 గంటల్లోనే 365 మిలియన్‌ వ్యూస్‌ను సొంతం చేసుకుని, సరికొత్త ప్రపంచ రికార్డును సృష్టించింది. ప్రపంచ సినీ చరిత్రలో ఇప్పటివరకూ ఏ చిత్రం 24 గంటల్లో ఈ స్థాయి వ్యూస్‌ను దక్కించుకోలేదు. ఈ ఘనత సాధించిన తొలి చిత్రంగా ‘డెడ్‌ పూల్‌ అండ్‌ వోల్వరైన్‌’ నిలిచింది.

డెడ్‌పూల్‌ కథేంటంటే: వేడ్‌ విల్సన్‌ (రేయాన్‌) కెనడియన్‌ స్పెషల్‌ ఫోర్స్‌లో పనిచేసి బయటకు వచ్చేస్తాడు. దొరికిన పని చేసుకుంటూ జీవనం సాగిస్తుంటాడు. ఈ క్రమంలోనే వానెస్సా (మోరెనా) అనే వ్యభిచారిణి పరిచయమవుతుంది. ఆమెతో కొంతకాలం సహజీవనం చేసి, వివాహం చేసుకోవాలనుకుంటాడు. ఈ క్రమంలో అతడికి క్యాన్సర్‌ ఉందనే విషయం తెలుస్తుంది. తాను చనిపోవడం వానెస్సా చూడకూడదని ఆ ఊరు విడిచి వెళ్లిపోతాడు. క్యాన్సర్‌ నయం చేయడానికి రహస్యంగా చేస్తున్న ఎడ్‌స్క్రీన్‌ (ఫ్రాన్సిస్‌ ఫ్రీమెన్‌) గురించి తెలియడంతో ఆ ప్రయోగాల్లో తాను భాగం అవుతాడు. ప్రయోగాల సమయంలో తీవ్ర చిత్ర హింసలకు గురవుతాడు. అయితే, ఆ ప్రయోగాల వల్ల వేడ్ శరీరం తీవ్ర మార్పులకు లోనవుతుంది. ఎవరూ గుర్తుపట్టలేనంత అసహ్యంగా తయారవుతుంది. అదే సమయంలో ఏ గాయమైనా దానంతట అదే మానిపోయేలా శరీరం స్పందిస్తుంది. ఆ ప్రయోగశాల నుంచి బయట పడిన వేడ్‌.. ఎడ్‌స్క్రీన్‌ను అంతం చేసేందుకు బయలు దేరతాడు. మరి అతడు అనుకున్నది సాధించాడా? ఎడ్‌స్క్రీన్‌ను ఎలా ఎదుర్కొన్నాడన్నది మిగిలిన కథ.