Dil Raju: అలాంటి సినిమా చేయాలని ఉంది..: డ్రీమ్‌ ప్రాజెక్ట్‌పై దిల్‌ రాజు

హైదరాబాద్‌: స్టార్‌ హీరోలతో వరుస చిత్రాలు నిర్మిస్తోన్న నిర్మాత దిల్‌రాజు (Dil Raju).. తాజాగా ఓ ఈవెంట్‌లో తన డ్రీమ్‌ ప్రాజెక్ట్‌ గురించి మాట్లాడారు. ‘‘హర్షిత్‌ రెడ్డి, హన్షిత ఇటీవల ‘దిల్‌రాజు ప్రొడక్షన్‌ హౌస్‌’ మొదలుపెట్టారు. కొత్త దర్శకులతో భిన్నమైన చిత్రాలు తెరకెక్కిస్తున్నారు. ఆసక్తి రేకెత్తించే కథలు ఉంటే వాళ్లూ స్టార్‌ హీరోలతో సినిమాలు చేస్తారు. నిర్మాతగా నా ప్రయాణం మొదలై 21 ఏళ్లు అవుతోంది. రానున్న నాలుగేళ్లలో భారీ పాన్‌ ఇండియా మూవీ చేయాలని ఉంది. అందుకు అనుగుణంగా పనులు మొదలుపెట్టాం’’

‘‘ఆర్య’ విడుదలై మే 7వ తేదీతో 20 ఏళ్లు అవుతోంది. ఆరోజు రీ యూనియన్‌ ప్లాన్‌ చేయాలనుకుంటున్నాం. ‘గేమ్‌ ఛేంజర్‌’ రిలీజ్‌ డేట్‌ దాదాపు ఖరారైంది. శంకర్‌ చెప్పిన వెంటనే మేము అనౌన్స్‌ చేస్తాం. ఐదు భాషల్లో విడుదల చేయనున్నాం. ‘టిల్లు స్క్వేర్‌’ డిస్ట్రిబ్యూటర్‌గా మేము విజయాన్ని అందుకున్నాం. ఏప్రిల్‌ 5న ‘ఫ్యామిలీ స్టార్‌’ విడుదల కానుంది. ఆ తర్వాత ‘లవ్‌ మీ’ విడుదల కానుంది. ఈ వేసవి మనదే’’ అని అన్నారు.