Hanuman: ఈ క్షణాలను జీవితాంతం గుర్తు పెట్టుకుంటా: ‘హనుమాన్‌’ దర్శకుడు ప్రశాంత్‌ వర్మ

హైదరాబాద్‌: ‘హనుమాన్‌’ (Hanuman) విడుదలై నేటితో 100 రోజులవుతోంది. తేజ సజ్జా హీరోగా ప్రశాంత్‌ వర్మ రూపొందించిన ఈ చిత్రం ఇప్పటికీ పలు థియేటర్లలో ప్రదర్శిస్తున్నారు. దీనిపై ప్రశాంత్‌ వర్మ హర్షం వ్యక్తం చేశారు. ‘‘ఈ అద్భుత ప్రయాణంలో భాగమైన వారికి నా కృతజ్ఞతలు. ఆనందంతో మనసు నిండిపోయింది. పలు థియేటర్లలో ‘హనుమాన్‌’ శత దినోత్సవం చేసుకోవడం సంతోషంగా ఉంది. ఈ క్షణాలను జీవితాంతం గుర్తుపెట్టుకుంటా. థియేటర్లలో ఒక సినిమా 100 రోజులు ఆడటమనేది అరుదుగా మారిన సమయంలో.. మాకు ఇలాంటి ఆనందాన్ని అందించిన ప్రేక్షకులకు ఎప్పటికీ రుణపడి ఉంటా. నాకెంతో సపోర్ట్‌ చేసిన చిత్రబృందానికి, మీడియా మిత్రులకు థ్యాంక్యూ’’ అని ఆయన ‘ఎక్స్‌’లో పోస్ట్‌ పెట్టారు. 

తేజ సజ్జా సైతం ఈ విషయంపై ఆనందం వ్యక్తం చేశారు. ‘‘ఆనందంతో మనసు నిండింది. మీ వల్లే దీనిని సాధించాననే విషయాన్ని ఎప్పటికీ గుర్తు పెట్టుకుంటా. ‘హనుమాన్‌’.. నాకు జీవితాంతం గుర్తుండే ఓ మధుర జ్ఞాపకం’’ అని పేర్కొన్నారు. సంక్రాంతి కానుకగా విడుదలై విశేష ప్రేక్షకాదరణ పొందిన చిత్రం ‘హనుమాన్‌’ (HanuMan). అమృతా అయ్యర్‌ కథానాయిక. వినయ్‌ రాయ్‌, వరలక్ష్మి శరత్‌కుమార్‌, వెన్నెల కిషోర్‌ కీలక పాత్రలు పోషించారు. ఇప్పటి వరకూ ఇది ప్రపంచవ్యాప్తంగా సుమారు రూ.300 కోట్లు రాబట్టినట్లు సమాచారం. ఈ చిత్రానికి కొనసాగింపుగా ‘జై హనుమాన్‌’ రానున్న విషయం తెలిసిందే. ప్రస్తుతం ప్రీ ప్రొడక్షన్‌ పనులు జరుగుతున్నట్లు సమాచారం. 2025లో ఇది విడుదల కానుంది.