Drishyam: రీమేక్‌ విషయంలో ‘దృశ్యం’ రికార్డు..

ఇంటర్నెట్‌ డెస్క్‌: రీమేక్‌ అయిన అన్ని భాషల్లోనూ ఘన విజయం అందుకున్న చిత్రం ‘దృశ్యం’ (Drishyam). తొలుత మలయాళంలో రూపొందిన ఈ సినిమా అదే పేరుతో తెలుగు (Drushyam), హిందీలో, ‘దృశ్య’ పేరుతో కన్నడలో, ‘పాపనాశనం’ పేరుతో తమిళ్‌లో తెరకెక్కి సత్తా చాటిన సంగతి తెలిసిందే. దానికి సీక్వెల్‌గా రూపొందిన ‘దృశ్యం 2’ కూడా విజయవంతమైంది. ఇప్పుడు ఈ ‘దృశ్యం’ సిరీస్‌ చిత్రాల కథలు కొరియన్‌ ప్రేక్షకులను అలరించేందుకు సిద్ధమయ్యాయి. ఇండియన్‌ సినిమా నిర్మాణ సంస్థ పనోరమ స్టూడియోస్‌, దక్షిణ కొరియాకు చెందిన సంస్థ ఆంథాలజీ స్టూడియోస్‌ సంయుక్తంగా ‘దృశ్యం’ సినిమాలను కొరియన్‌లో రీమేక్‌ చేయబోతున్నాయి. ‘కేన్స్‌ ఫెస్టివల్‌’ వేదికపై ఈ ప్రకటన వెలువడింది. కొరియన్‌ చిత్ర పరిశ్రమలో రీమేక్‌ అవుతున్న తొలి భారతీయ చిత్రంగా ‘దృశ్యం’ రికార్డు సృష్టించింది.

ముందుగా.. ‘దృశ్యం’ సినిమాని మోహన్‌లాల్‌, మీనా ప్రధాన పాత్రల్లో దర్శకుడు జీతూ జోసెఫ్‌ తెరకెక్కించారు. తెలుగులో వెంకటేశ్‌ హీరోగా శ్రీప్రియ పార్ట్‌ 1 తెరకెక్కించగా, పార్ట్‌ 2ను జీతూ జోసెఫ్‌ తెరకెక్కించారు. హిందీలో అజయ్‌ దేవ్‌గణ్‌, శ్రియ ప్రధాన పాత్రల్లో నటించారు. వేర్వేరు దర్శకులు వాటిని రూపొందించారు. తమిళ్‌ విషయానికొస్తే.. కమల్‌హాసన్‌, గౌతమి ప్రధాన పాత్రధారులు. అనుకోకుండా జరిగిన ఓ హత్య చుట్టూ సాగే కుటుంబ కథలు ఇవి. కథానాయకుడు సినిమా తెలివి తేటల్ని ఉపయోగిస్తూ పోలీసుల చేతికి దొరక్కుండా తన కుటుంబాన్ని ఎలా కాపాడాడన్నది ఆసక్తికరం. త్వరలోనే మలయాళంలో ‘దృశ్యం 3’ రానుంది.