Family star: మా కుటుంబానికి నాన్నే ఫ్యామిలీ స్టార్‌

‘‘మనకు ఏ కష్టం వచ్చినా అండగా నిలిచి నేనున్నానని ధైర్యం చెప్పే వ్యక్తి కుటుంబంలో ఒకరుంటారు. ఆ ఒక్కరే ఫ్యామిలీ స్టార్‌. మా కుటుంబంలో మా నాన్న ఫ్యామిలీ స్టార్‌’’ అన్నారు హీరో విజయ్‌ దేవరకొండ. ఆయన.. మృణాల్‌ ఠాకూర్‌ జంటగా పరశురామ్‌ తెరకెక్కించిన సినిమా ‘ఫ్యామిలీస్టార్‌’. దిల్‌రాజు, శిరీష్‌ సంయుక్తంగా నిర్మించారు. ఈ చిత్రం ఈ నెల 5న తెలుగు, తమిళ, హిందీ భాషల్లో విడుదల కానుంది. ఈ నేపథ్యంలోనే సోమవారం హైదరాబాద్‌లో విలేకర్ల సమావేశం ఏర్పాటు చేశారు. ఈ సందర్భంగా హీరో విజయ్‌ దేవరకొండ మాట్లాడుతూ.. ‘‘దర్శకుడు పరశురామ్‌ ఈ కథ చెప్పినప్పుడు ఆయన జీవితంలోని అనుభవాలను ఊహించుకుంటూ చెప్పాడు. కథ వింటున్నప్పుడు మాత్రం నాకు మా నాన్న గుర్తొచ్చారు. కుటుంబం కోసం ఆయన పడిన తపన గుర్తొచ్చింది. అందుకే ఈ చిత్రంలో హీరో పాత్రకు గోవర్ధన్‌ అనే పేరు పెట్టమని చెప్పాను. ఎందుకంటే ఆ పేరు పెట్టుకున్న తర్వాత భావోద్వేగాలు పలికించడం సులువవుతుంది. ఈ నెల 5న ఈ చిత్రం విడుదలవుతోంది. 8న మా నాన్న పుట్టినరోజు. ఈ సినిమా విషయంలో ఆయన గర్వపడతారని ఆశిస్తున్నా. ‘గీత గోవిందం’కు ఈ సినిమాకి ఏమాత్రం పోలిక ఉండదు. ఆ చిత్రంతో పోలిస్తే నటుడిగా నేను.. దర్శకుడిగా పరశురామ్‌ ఎంత పరిణతి సాధించామో చూస్తారు. ఈ సినిమాకి నాకు పేరొస్తే ఆ క్రెడిట్‌ పరశురామ్‌కు ఇస్తా’’ అన్నారు. ‘‘మనల్ని ప్రోత్సహించి ముందుకు నడిపించే వారు కుటుంబంలో ఒకరుంటారు. అలాంటి వారిని గుర్తు చేసుకునే ప్రయత్నమే ఈ చిత్రం’’ అంది నటి మృణాల్‌. నిర్మాత దిల్‌రాజు మాట్లాడుతూ.. ‘‘ఈ చిత్రానికి విజయ్‌ క్యారెక్టరైజేషన్‌ వెన్నుముక లాంటిది. విజయ్‌ హీరోగా మా సంస్థలో ఓ భారీ పాన్‌ ఇండియా సినిమా చేయనున్నాం. దాని స్క్రిప్ట్‌ సిద్ధమైంది. ప్రీ ప్రొడక్షన్‌ పనులకు మరింత సమయం పట్టనుంది. అది పూర్తయ్యాక సినిమా సెట్స్‌పైకి వెళ్తుంది’’ అన్నారు.