Chiranjeevi: అమెరికాలో చిరంజీవికి సన్మానం.. అభిమానులనుద్దేశించి హీరో ఏమన్నారంటే?

ఇంటర్నెట్‌ డెస్క్‌: అమెరికా పర్యటనలో ఉన్న ప్రముఖ హీరో చిరంజీవి (Chiranjeevi)ని అక్కడి అభిమానులు సన్మానించారు. ఇటీవల ఆయనకు కేంద్రప్రభుత్వం పద్మ విభూషణ్‌ ప్రకటించిన సంగతి తెలిసిందే. ఈసందర్భంగా లాస్‌ ఏంజిల్స్‌ నిర్మాత టీజీ విశ్వప్రసాద్‌ ఆధ్వర్యంలో సన్మాన సభ నిర్వహించారు. పెద్ద సంఖ్యలో ఫ్యాన్స్‌ పాల్గొని సందడి చేశారు. చిరంజీవి మాట్లాడుతూ.. ‘‘నాకొచ్చిన ఈ అవార్డును మీకొచ్చినట్లుగా భావించడం చాలా సంతోషంగా ఉంది. పురస్కారం వరించినప్పుడు ఆనందమే. ఆ గుర్తింపు వల్ల నాతోపాటు మీరంతా హ్యాపీగా ఉన్నారు. ఇంతకుమించిన అవార్డేముంటుంది’’ అని పేర్కొన్నారు. సంబంధిత విజువల్స్‌ నెట్టింట వైరల్‌గా మారాయి. ఇంతకుముందు తెలంగాణ రాష్ట్ర ప్రభుత్వం ఆయనతోపాటు పద్మ అవార్డులకు ఎంపికైన తెలుగువారిని సత్కరించిన విషయం తెలిసిందే.

సతీసమేతంగా చిరంజీవి కొన్నిరోజుల క్రితమే అమెరికా వెళ్లారు. తమను ఆహ్వానించిన వేడుకల్లో పాల్గొని, సంబంధిత ఫొటోలను ఆయన సోషల్‌ మీడియాలో పోస్ట్‌ చేస్తున్నారు. అక్కడినుంచి వచ్చిన తర్వాత ‘విశ్వంభర’ (Vishwambhara) చిత్రీకరణలో పాల్గొంటారు. ‘బింబిసార’ దర్శకుడు వశిష్ఠ తెరకెక్కిస్తున్న సోషియో ఫాంటసీ చిత్రమిది. త్రిష కథానాయిక. వచ్చే ఏడాది సంక్రాంతి కానుకగా జనవరి 10న విడుదల చేసేందుకు సన్నాహాలు చేస్తున్నారు.