Akshay Kumar: 200 గుర్రాలతో భారీ యాక్షన్‌

హిందీ ప్రేక్షకులు ఆసక్తిగా ఎదురుచూస్తున్న చిత్రాల్లో ‘వెల్‌కమ్‌ టు ది జంగిల్‌’ ఒకటి. అక్షయ్‌ కుమార్‌ ప్రధాన పాత్రలో అహ్మద్‌ ఖాన్‌ తెరకెక్కిస్తున్న యాక్షన్‌ ఎంటర్‌టైనర్‌ చిత్రమిది. ‘వెల్‌కమ్‌’ ఫ్రాంచైజీలో రానున్న ఈ మూడో భాగంలో దిశా పటానీ, రవీనా టాండన్, జాక్వెలెన్‌ ఫెర్నాండజ్‌ తదితరులు కీలక పాత్రలు పోషిస్తున్నారు. తాజాగా ముంబయిలో ఓ భారీ యాక్షన్‌ సన్నివేశాల చిత్రీకరణ పూర్తైనట్లు సమాచారం. ‘దాదాపు 200 గుర్రాలతో పవర్‌ ప్యాక్డ్‌ యాక్షన్‌ సీక్వెన్స్‌ని చిత్రీకరించారు. ఏడు రోజుల పాటు జరిగిన ఈ షూటింగ్‌లో సన్నివేశాల్ని మునుపెన్నడూ చూడని విధంగా తీర్చిదిద్దారు. పది ఎకరాల స్థలంలో భారీ సెట్‌ వేసి ఈ ఘట్టాల్ని రూపొందించారు’ అని సన్నిహిత వర్గాలు తెలిపాయి. క్రిస్మస్‌ కానుకగా ఈ ఏడాది డిసెంబరు 20న ఈ సినిమా అభిమానుల ముందుకు రానుంది.