Viduthalai: అప్పుడు ‘కాంతార’.. ఇప్పుడు ‘విడుతలై’.. అలా తెలుగు ప్రేక్షకుల ముందుకు

ఇంటర్నెట్‌ డెస్క్‌: కన్నడలో హిట్‌గా నిలిచిన ‘కాంతార’ (Kantara)ను తెలుగు ప్రేక్షకుల ముందుకు తీసుకొచ్చిన సంస్థ గీతా ఫిల్మ్‌ డిస్ట్రిబ్యూషన్‌. ఆ సినిమా తెలుగులోనూ మంచి విజయాన్ని అందుకున్న సంగతి తెలిసిందే. అదే తరహాలో తమిళ్‌లో విశేష ప్రేక్షకాదరణ పొందుతోన్న ‘విడుతలై పార్ట్‌ 1’ (Viduthalai Part 1) సినిమాని ఇక్కడి ప్రేక్షకులకు పరిచయం చేసేందుకు సిద్ధమయ్యారు ఆ సంస్థ అధినేత, ప్రముఖ నిర్మాత అల్లు అరవింద్‌ (Allu Aravind). ఈ మేరకు ‘విడుతలై’ చిత్ర దర్శకుడు వెట్రిమారన్‌, నిర్మాత ఎల్రెడ్‌ కుమార్‌లను ఆయన కలిశారు. సంబంధిత ఫొటోను సోషల్‌ మీడియాలో పోస్ట్‌ చేశారు. విడుదల తేదీని త్వరలోనే ప్రకటించనున్నారు. ‘కాంతార’ తర్వాత ‘మాలికాపురం’ (మలయాళం) సినిమాని తెలుగులో విడుదల చేసి, మంచి స్పందన దక్కించుకుంది ‘గీతా ఫిల్మ్‌ డిస్ట్రిబ్యూషన్‌’. దాంతో ఆ సంస్థ నుంచి విడుదలయ్యే చిత్రాలపై ప్రేక్షకుల్లో ఆసక్తి నెలకొంటోంది.

విజయ్‌ సేతుపతి(Vijay Sethupathi), సూరి (Soori) కథానాయకులుగా రూపొందిన ‘విడుతలై పార్ట్‌ 1’ మార్చి 31న తమిళ్‌లో విడుదలైంది. పోలీసు కానిస్టేబుల్‌ కథతో పీరియాడికల్‌ క్రైమ్‌ థ్రిల్లర్‌గా సుమారు రూ. 40 కోట్ల బడ్జెట్‌తో రూపొందిన ఈ చిత్రం ఇప్పటికే రూ. 23 కోట్లకిపైగా వసూళ్లు సాధించింది. ఇంతకాలం కమెడియన్‌గా అలరించిన సూరి సీరియస్‌ పాత్రలో కనిపించి, ప్రేక్షకులను ఆశ్చర్యానికి గురిచేశారు.