Thangalaan: కొత్త అవతారం... విక్రమ్‌ కష్టం

సినిమాలలో వైవిధ్యమైన పాత్రలను ఎంచుకుంటూ ప్రేక్షకులను అలరిస్తున్నారు కథానాయకుడు విక్రమ్‌. ఆయన ప్రధాన పాత్రలో నటిస్తున్న చిత్రం ‘తంగలాన్‌’. పా.రంజిత్‌ ఈ చిత్రాన్ని తెరకెక్కిస్తున్నారు. కోలార్‌ గోల్డ్‌ ఫీల్డ్‌లోని కార్మికుల జీవితాల చుట్టూ జరిగే వాస్తవ సంఘటనల ఆధారంగా ఈ సినిమా రూపొందుతోంది. విక్రమ్‌ పుట్టినరోజు సందర్భంగా ఈ సినిమా మేకింగ్‌ వీడియోను చిత్రబృందం సోమవారం విడుదల చేసింది. ఇందులో కొత్త అవతారంలో కనిపిస్తూ ప్రేక్షకులను ఆకట్టుకుంటున్నారు విక్రమ్‌. ఆయన తన పాత్ర కోసం ఏవిధంగా కష్టపడుతున్నాడో ఇందులో చూపించారు. ఈ సినిమాలో మాళవిక మోహనన్‌, పార్వతి, డేనియల్‌ కాల్లాగిరోన్‌ కీలక పాత్రలు పోషిస్తున్నారు. ప్రస్తుతం ‘పొన్నియిన్‌ సెల్వన్‌ 2’ చిత్రంలో కీలక పాత్రలో నటిస్తున్నారు విక్రమ్‌.