తమ్ముడి కోసం అక్క పోరాటం

‘‘సోదరుడికి రాఖీ కట్టడం అంటే అతనికి ఎలాంటి హానీ జరగకుండా కాపాడుకుంటానని చేసే ప్రమాణం. నిన్ను కాపాడుకోవడం నా కర్తవ్యం’’ అంటూ తన తమ్ముడి కోసం పోరాడుతుంది ఓ సోదరి. మరి ఆమె ఎవరు..? తన తమ్ముడికి ఏ హాని పొంచి ఉంది? అనేది తెలియాలంటే ‘జిగ్రా’ చూడాల్సిందే. బాలీవుడ్‌ నాయికా అలియా భట్‌ కీలక పాత్రలో నటిస్తున్న చిత్రమిది. వాసన్‌ బాలా తెరకెక్కిస్తున్నారు. అలియా, కరణ్‌ జోహార్‌ సంయుక్తంగా నిర్మిస్తున్నారు. తాజాగా ఈ సినిమా చిత్రీకరణ పూర్తయినట్లు తెలుపుతూ.. సామాజిక మాధ్యమాల వేదికగా కొన్ని ఫొటోలను పంచుకుంది అలియా. ‘ఆర్చీస్‌’ చిత్రంలో కీలక పాత్ర పోషించిన వేదాంగ్‌ రైనా.. ఇందులో అలియాకి సోదరుడిగా నటిస్తున్నారు. అక్కతమ్ముళ్ల మధ్య అనుబంధంతో ఈ చిత్రాన్ని రూపొందిస్తున్నారు. సెప్టెంబరు 27న ఈ సినిమా విడుదల కానున్నట్లు తెలిపింది చిత్రబృందం.