ముగ్గురూ ముగ్గురే... ఎక్కడా తగ్గరే

తెరపై ముగ్గురు అందాల తారలు సందడి చేస్తే ఎలా ఉంటుందో చూపించడానికి ‘ది క్రూ’ చిత్రబృందం సిద్ధమవుతోంది. ఈ చిత్రంలో బాలీవుడ్‌ అగ్రకథానాయికలు టబు, కృతి సనన్‌, కరీనా కపూర్‌ కీలక పాత్రలు పోషిస్తున్నారు. కామెడీ నేపథ్యంలో రాజేష్‌ కృష్ణన్‌ తెరకెక్కిస్తున్నారు. ‘మా విమానంలోకి మీ అందరికీ స్వాగతం’ అంటూ ఇటీవలే ఇందులో ఈ అందాల భామలు పోషిస్తున్న పాత్రల గురించి తెలిపింది చిత్రబృందం. తాజాగా ఈ సినిమాలోని ఈ ముగ్గురు నాయికల ఫస్ట్‌లుక్‌లను సామాజిక మాధ్యమాల వేదికగా పంచుకుంది. ‘ఒకరు అబద్ధాలతో, మరొకరు దొంగలించడానికి, నకిలీ వేషాలతో ఇంకొకరు రెడీగా ఉన్నారు. మరి మా సిబ్బందితో కలిసి ప్రయాణించడానికి మీరు సిద్ధమేనా?’’ అంటూ వ్యాఖ్యల్ని జోడించింది. ఇందులో పదునైనా చూపులతో ఎయిర్‌హోస్టెస్‌గా కనిపిస్తూ సినీప్రియులను ఆకట్టుకుంటున్నారు ఈ ముగ్గురు భామలు. దిల్జీత్‌ దోసాంజ్‌, కపిల్‌ శర్మ కీలక పాత్రల్లో నటిస్తున్నారు. ఎయిర్‌హోస్టెస్‌గా పనిచేస్తున్న ముగ్గురు మహిళల జీవితం ఆధారంగా రూపొందుతున్న చిత్రమిది. ఏక్తా కపూర్‌, రియా కపూర్‌ నిర్మిస్తున్న ఈ సినిమా మార్చి 29న రానుంది.