కనులెందుకో కలిసేనులే...

సుధీర్‌బాబు కథానాయకుడిగా తెరకెక్కుతున్న చిత్రం ‘హరోం హర’. ది రివోల్ట్‌.. అనేది ఉపశీర్షిక. మాళవిక శర్మ కథానాయిక. జ్ఞానసాగర్‌ ద్వారక దర్శకత్వం వహిస్తున్నారు. సుమంత్‌.జి నాయుడు నిర్మాత. యాక్షన్‌ థ్రిల్లర్‌గా రూపొందుతున్న ఈ సినిమాలోని ‘కనులెందుకో కలిసేనులే...’ అంటూ సాగే పాటని బుధవారం విడుదల చేశారు. చైతన్‌ భరద్వాజ్‌ స్వరపరిచిన ఈ పాటని ఆయనతో కలిసి నిఖితా శ్రీవల్లి ఆలపించారు. వెంగీ సాహిత్యం సమకూర్చారు. ‘‘1989లో కుప్పంలో జరిగిన ఓ సంఘటన స్ఫూర్తితో రూపొందుతున్న చిత్రమిది. సుధీర్‌బాబు ఆ ప్రాంతం యాసతో సంభాషణలు చెప్పారు. యాక్షన్‌ ప్రధానంగా సాగే ఈ సినిమా ప్రేక్షకులకు థ్రిల్‌ని పంచుతుంది. మంచి మెలోడీతో సాగే ‘కనులెందుకో...’ పాటలో సుధీర్‌బాబు, మాళవిక మధ్య కెమిస్ట్రీ చాలా బాగుంటుంది. విజువల్స్‌ ఆకట్టుకుంటాయి. చిత్రీకరణ పూర్తయింది. త్వరలోనే సినిమా విడుదల తేదీని ప్రకటిస్తామ’’ని సినీవర్గాలు తెలిపాయి. సునీల్‌ కీలక పాత్ర పోషిస్తున్న ఈ చిత్రానికి ఛాయాగ్రహణం: అరవింద్‌ విశ్వనాథన్‌, కూర్పు: రవితేజ గిరిజాల.