రామోజీ ఫిల్మ్‌సిటీలో తమ్ముడు

నితిన్‌ కథానాయకుడిగా శ్రీ వెంకటేశ్వర క్రియేషన్స్‌ పతాకంపై తెరకెక్కుతున్న చిత్రం ‘తమ్ముడు’. సప్తమిగౌడ కథానాయిక. శ్రీరామ్‌ వేణు దర్శకత్వం వహిస్తున్నారు. దిల్‌ రాజు, శిరీష్‌ నిర్మాతలు. ఈ సినిమా చిత్రీకరణ ప్రస్తుతం రామోజీ ఫిల్మ్‌సిటీలో జరుగుతోంది. ప్రొడక్షన్‌ డిజైనర్‌ మునిశేఖర్‌ సారథ్యంలో తీర్చిదిద్దిన ప్రత్యేకమైన సెట్‌లో... ఓ భారీ  పోరాట ఘట్టాన్ని  తెరకెక్కిస్తున్నారు. యాక్షన్‌ కొరియోగ్రాఫర్‌ విక్రమ్‌ మోర్‌ నేతృత్వంలో ఈ సన్నివేశాల్ని తెరకెక్కిస్తున్నారు. వారం రోజులపాటు చిత్రీకరించే ఈ పోరాట ఘట్టం చిత్రానికి ప్రధాన ఆకర్షణ అని సినీవర్గాలు స్పష్టం చేశాయి. తమ్ముడు, అక్క బంధం చుట్టూ సాగే కథ ఇది. సోదరి పాత్రలో సీనియర్‌ కథానాయిక నటిస్తున్నారు. ‘వకీల్‌సాబ్‌’ తర్వాత శ్రీరామ్‌ వేణు తెరకెక్కిస్తున్న ఈ చిత్రానికి సంగీతం: అజనీష్‌ లోక్‌నాథ్‌, ఛాయాగ్రహణం: సమీర్‌రెడ్డి.