రామోజీ ఫిల్మ్‌సిటీలో ‘కుబేర’ సందడి

ధనుష్‌ కథానాయకుడిగా నటిస్తున్న చిత్రం ‘కుబేర’. ప్రముఖ దర్శకుడు శేఖర్‌ కమ్ముల దర్శకత్వం వహిస్తున్న ఈ చిత్రంలో అగ్ర హీరో నాగార్జున కీలక పాత్రలో నటిస్తున్నారు. ఇటీవల విడుదల చేసిన ఆయన ఫస్ట్‌లుక్‌కు మంచి స్పందన లభించింది. తాజాగా ఈ సినిమాలోని కీలక సన్నివేశాల చిత్రీకరణ రామోజీ ఫిల్మ్‌సిటీలో జరిగింది. గుడి నేపథ్యంలో సాగే సీన్స్‌తో పాటు మరిన్ని ప్రత్యేక సన్నివేశాలను ధనుష్‌ తదితరులపై తెరకెక్కించారు. రష్మిక, జిమ్‌ సర్బ్‌ ఇతర ప్రధాన పాత్రల్లో నటిస్తున్న ఈ చిత్రాన్ని తెలుగు, తమిళ, హిందీ భాషల్లో ఏక కాలంలో తీర్చిదిద్దుతున్నారు. శ్రీ వెంకటేశ్వర సినిమాస్‌ ఎల్‌ఎల్‌పీ, అమిగోస్‌ క్రియేషన్స్‌ ప్రై.లి పతాకాలపై సునీల్‌ నారంగ్, పుస్కుర్‌ రామ్‌ మోహన్‌రావు నిర్మిస్తున్నారు.