ఆషికా.. మిస్‌ యు

‘నా సామిరంగ’ చిత్రంతో ప్రేక్షకుల్ని మెప్పించిన ఆషికా రంగనాథ్‌ ప్రస్తుతం చిరంజీవితో ‘విశ్వంభర’లో సందడి చేస్తున్న సంగతి తెలిసిందే. అయితే ఇప్పుడీ అమ్మడు మరో అవకాశం అందిపుచ్చుకుంది. ప్రస్తుతం సిద్ధార్థ్‌ హీరోగా ఎన్‌.రాజశేఖర్‌ దర్శకత్వంలో ఓ చిత్రం తెరకెక్కుతోంది. ఇందులో నాయికగా ఆషికాను ఎంపిక చేశారు. ఆమె ఈ విషయాన్ని ఇన్‌స్టాలో స్వయంగా ప్రకటించారు. ఈ సినిమాకి ‘మిస్‌ యు’ అనే పేరును ఖరారు చేసినట్లు తెలియజేస్తూ ఫస్ట్‌లుక్‌ను పంచుకున్నారు. ‘‘హృదయాన్ని కదిలించే ఈ అందమైన కథలో భాగమైనందుకు చాలా సంతోషంగా ఉంది. ఇది నాకెంతో ప్రత్యేకం’’ అంటూ ఆ పోస్టర్‌కు ఓ వ్యాఖ్యను కూడా జత చేసింది.