ఈరోజు చిత్ర పరిశ్రమ బంద్‌

రామోజీరావు మరణవార్త తెలుగు చిత్ర పరిశ్రమను తీవ్రంగా కలచివేసింది. ఆయన మృతికి సంతాప సూచకంగా ఆదివారం చిత్ర పరిశ్రమ బంద్‌కు పిలుపునిచ్చినట్లు చలన చిత్ర నిర్మాతల మండలి శనివారం ప్రకటించింది. ‘‘రామోజీరావు మరణం సినీ పరిశ్రమకు తీరని లోటు. తెలుగు వార్తా రంగంలో, వినోద రంగంలో ఆయన ఎనలేని కృషి చేశారు. నిర్మాతగా, డిస్ట్రిబ్యూటర్‌గా సేవలందించారు. ఆయన చేసిన సేవలు ప్రతి భారతీయుడి మదిలో ఎప్పటికీ గుర్తుండిపోతాయి’’ అని ఆ ప్రకటనలో నిర్మాతల మండలి పేర్కొంది. ఇక రామోజీ మృతి పట్ల తెలంగాణ రాష్ట్ర ఫిల్మ్‌ ఛాంబర్‌ ఆఫ్‌ కామర్స్, తెలుగు ఫిల్మ్‌ ఛాంబర్‌ ఆఫ్‌ కామర్స్‌ కూడా సంతాపం తెలియజేశాయి.