భావోద్వేగాల లాక్‌డౌన్‌

ఎంతో మంది జీవితాలను చిన్నాభిన్నం చేసిన కరోనా మహమ్మారిలో చిక్కుకున్న ఓ అమ్మాయి.. నాన్న నాన్న అంటూ ఆవేదనతో పిలుస్తోంది. మరి ఆమె కథేమిటో తెలుసుకోవాలంటే ‘లాక్‌డౌన్‌’ సినిమా చూడాల్సిందే. ప్రస్తుతం వరుస చిత్రాలతో తీరిక లేకుండా గడుపుతున్న కథానాయిక అనుపమ పరమేశ్వరన్‌ ప్రధాన పాత్రలో నటిస్తున్న చిత్రమిది. ఏఆర్‌ జీవా తెరకెక్కిస్తున్నారు. తాజాగా ఈ సినిమా టీజర్‌ను ఎక్స్‌ వేదికగా విడుదల చేసింది లైకా ప్రొడక్షన్స్‌. ‘‘నిరీక్షణ ముగిసింది. గందరగోళం, కుట్రలు, భావోద్వేగాలతో కూడిన ‘లాక్‌డౌన్‌’ టీజర్‌ వచ్చేసింద’’ని వ్యాఖ్యల్ని జోడించింది. ఆందోళనగా వీధుల్లో తిరుగుతున్న అనుపమను చూపిస్తూ.. భావోద్వేగాలతో సాగుతున్న ఈ టీజర్‌ ఆద్యంతం ఆసక్తిగా సాగుతుంది. లాక్‌డౌన్‌ విధించిన తర్వాత తెలియని ప్రదేశంలో చిక్కుకున్న ఓ అమ్మాయి కథను ఇందులో చూపించనున్నట్లు తెలుస్తోంది.