రవితేజ 75వ చిత్రం ప్రారంభం

‘ధమాకా’తో అలరించారు రవితేజ - శ్రీలీల. ఈ జోడీ మరో సినిమాతో సందడి చేయనుంది. ఫార్చ్యూన్‌ ఫోర్‌ సినిమాస్‌తో కలిసి సితార ఎంటర్‌టైన్‌మెంట్స్‌ సంస్థ నిర్మిస్తున్న ఆ సినిమా మంగళవారం హైదరాబాద్‌లో ప్రారంభమైంది. రవితేజకు ఇది 75వ చిత్రం. యువ రచయిత భాను భోగవరపు దర్శకుడిగా పరిచయం అవుతున్నారు. సూర్యదేవర నాగవంశీ, సాయి సౌజన్య నిర్మాతలు. పూజా కార్యక్రమాలతో పాటు, మంగళవారం నుంచే రెగ్యులర్‌ చిత్రీకరణనీ ప్రారంభించారు. ముహూర్తపు సన్నివేశానికి శ్రీలీల క్లాప్‌నిచ్చారు. ‘‘రవితేజ అనగానే గుర్తొచ్చేది మాస్‌ అంశాలు, కామెడీనే. మరోసారి మాస్‌ పాత్రతో ఆయన హాస్యం పంచనున్నారు. పలు విజయవంతమైన చిత్రాలకి రచయితగా పనిచేసిన భాను భోగవరపు ఓ మంచి స్క్రిప్ట్‌తో, రవితేజ 75వ చిత్రాన్ని తెరకెక్కిస్తున్నారు. ‘ధమాకా’ విజయంలో కీలక పాత్ర పోషించిన సంగీత దర్శకుడు భీమ్స్‌ సిసిరోలియో స్వరాలు సమకూరుస్తున్నార’’ని సినీ వర్గాలు తెలిపాయి. ఈ చిత్రానికి ఛాయాగ్రహణం: విధు అయ్యన్న, కూర్పు: నవీన్‌  నూలి, సంభాషణలు: నందు సవిరిగాన, కళ: నాగేంద్ర తంగాల, సమర్పణ: శ్రీకర స్టూడియోస్‌.