Mumbaikar: విజయ్‌ సేతుపతి తొలి హిందీ చిత్రం.. నేరుగా ఓటీటీలోకి.. ఉచితంగా!

ఇంటర్నెట్‌ డెస్క్‌: కోలీవుడ్‌ ప్రముఖ హీరో విజయ్‌ సేతుపతి (Vijay Sethupathi) నటించిన తొలి హిందీ చిత్రం.. ‘ముంబైకర్‌’ (Mumbaikar). ఇప్పటికే విడుదలకావాల్సిన ఈ సినిమా వాయిదా పడుతూ వచ్చింది. ఎట్టకేలకు ఇప్పుడు విడుదలకు సిద్ధమైంది. థియేటర్లలో కాకుండా నేరుగా ఓటీటీలో రిలీజ్‌ కానుంది. ఈ చిత్రం జూన్‌ 2 నుంచి ‘జియో సినిమా’ (jio cinema)లో ఉచితంగా స్ట్రీమింగ్‌ కానుంది. సోషల్‌ మీడియా వేదికగా సదరు ఓటీటీ సంస్థ ఈ వివరాలు వెల్లడించింది. తెలుగులోనూ ఈ సినిమా సందడి చేయనుంది. ఈ ప్రకటనపై విజయ్‌ సేతుపతి అభిమానులు ఆనందం వ్యక్తం చేస్తున్నారు.

దర్శకుడు లోకేశ్‌ కనకరాజ్‌ తెరకెక్కించిన ‘మానగరం’ (Maanagaram) సినిమాకి రీమేక్‌గా రూపొందింది ‘ముంబైకర్‌’. దీనికి ఛాయగ్రాహకుడు సంతోశ్‌ శివన్‌ దర్శకత్వం వహించారు. విక్రాంత్‌, సంజయ్‌ మిశ్రా, తాన్య, రణ్‌వీర్‌ షోరే తదితరులు కీలక పాత్రలు పోషించారు. శ్రీ, సందీప్‌ కిషన్‌, రెజీనా ప్రధాన పాత్రలు పోషించిన ‘మానగరం’.. బాక్సాఫీసు వద్ద మంచి వసూళ్లు రాబట్టిన సంగతి తెలిసిందే. వెబ్‌సిరీస్‌ ‘ఫర్జీ’తో బాలీవుడ్‌ ప్రేక్షకుల్ని అలరించిన విజయ్‌ సేతుపతి ప్రస్తుతం అక్కడ ‘మెరీ క్రిస్మస్‌’ చిత్రంలో నటిస్తున్నారు. శ్రీరామ్‌ రాఘవన్‌ దర్శకత్వం వహిస్తున్న ఈ చిత్రంలో కత్రినా కైఫ్‌ కథానాయిక. మరోవైపు, షారుక్‌ఖాన్‌ హీరోగా అట్లీ తెరకెక్కిస్తున్న ‘జవాన్‌’లో విజయ్‌ సేతుపతి కీలక పాత్ర పోషిస్తున్నారు.