అనుకున్న తేదీకే టాక్సిక్‌

యశ్‌ కథానాయకుడిగా గీతూ మోహన్‌దాస్‌ దర్శకత్వంలో రూపొందుతున్న ‘టాక్సిక్‌: ఎ ఫెయిరీటేల్‌ ఫర్‌ గ్రోన్‌ - అప్స్‌’ అనుకున్న తేదీకే ప్రేక్షకుల ముందుకు రానుంది. విడుదలలో ఎలాంటి మార్పు లేదని గురువారం స్పష్టతనిచ్చాయి నిర్మాణ సంస్థలు. కేవీఎన్‌ ప్రొడక్షన్స్, మాన్‌స్టర్‌ మైండ్‌ క్రియేషన్స్‌ సంస్థలపై వెంకట్‌ కె.నారాయణ, యశ్‌ సంయుక్తంగా నిర్మిస్తున్న చిత్రమిది. మార్చి 19న విడుదల చేయనున్నట్టు ఇదివరకే అధికారికంగా ప్రకటించాయి సినీ వర్గాలు. అయితే ఈ సినిమా వాయిదా పడుతుందంటూ సామాజిక మాధ్యమాల్లో ప్రచారం సాగింది. దీనిపై చిత్రబృందం స్పష్టతనిస్తూ ఇంకా 140 రోజుల్లో చిత్రం ప్రేక్షకుల ముందుకు రావడం ఖాయం అంటూ ప్రకటించింది. సంచలన విజయాల్ని సొంతం చేసుకున్న ‘కె.జి.ఎఫ్‌’ చిత్రాల తర్వాత యశ్‌ కథానాయకుడిగా కన్నడ, ఆంగ్ల భాషల్లో రూపొందుతున్న చిత్రమిది. హిందీ, తెలుగు, తమిళ, మలయాళ భాషల్లోనూ ప్రపంచవ్యాప్తంగా ఒకేసారి విడుదల కానుంది. జనవరి నుంచి ప్రచార కార్యక్రమాలు మొదలు కానున్నాయి.