ఇది సైన్స్‌ ఊహకే అందనిది!

ఈ క్రిస్మస్‌ బరిలో ‘శంబాల: ఎ మిస్టికల్‌ వరల్డ్‌’తో థ్రిల్‌ పంచేందుకు సిద్ధమవుతున్నారు ఆది సాయికుమార్‌. ఆయన హీరోగా నటించిన ఈ సినిమాని యుగంధర్‌ ముని తెరకెక్కించారు. రాజశేఖర్‌ అన్నభీమోజు, మహీధర్‌ రెడ్డి నిర్మించారు. అర్చన అయ్యర్, శ్వాసిక కథానాయికలు. రవివర్మ, మధునందన్‌ తదితరులు కీలక పాత్రలు పోషించారు. ఈ చిత్రం డిసెంబరు 25న థియేటర్లలోకి రానుంది. ఈ నేపథ్యంలోనే కథానాయకుడు ప్రభాస్‌ శనివారం ఈ చిత్ర ట్రైలర్‌ని విడుదల చేశారు.

‘‘కొన్ని వేల సంవత్సరాల క్రితం పరమశివుడికి.. అసురుడికి మధ్య జరిగిన ఒక భీకర యుద్ధం ఈ కథకి మూలం’’ అంటూ సాయికుమార్‌ డైలాగ్‌తో మొదలైన ట్రైలర్‌ ఆద్యంతం ఆసక్తి రేకెత్తిస్తూ సాగింది. ఇది దేవుడు, నమ్మకం, సైన్స్‌ అంశాలతో ముడిపడి సాగే సినిమా. శంబాల గ్రామంలో ఆకాశం నుంచి ఓ భారీ రాయి లాంటి వింత వస్తువు రాలిపడటం.. ఆ తర్వాత నుంచి ఆ ఊర్లో వరుస చావులు మొదలవ్వడం.. ఆ సమస్యను పరిష్కరించడం కోసం హీరో రంగంలోకి దిగడం ట్రైలర్‌లో చూపించారు. ‘‘ప్రతి ప్రశ్నకి సైన్స్‌లో ఒక సమాధానం ఉంటుందనుకున్నాను. కానీ, ఇది సైన్స్‌ ఊహకే అందనిది’’ అంటూ ట్రైలర్‌లో ఆది సాయికుమార్‌ చెప్పిన డైలాగ్‌ ఆకర్షణగా నిలిచింది. ఈ చిత్రానికి సంగీతం: శ్రీచరణ్‌ పాకాల, ఛాయాగ్రహణం: ప్రవీణ్‌ కె బంగారి.