Double Ismart: ‘డబుల్‌ ఇస్మార్ట్‌’లో సంజయ్‌ దత్‌!

కథానాయకుడు రామ్‌.. దర్శకుడు పూరి జగన్నాథ్‌ కలయికలో తెరకెక్కుతున్న పాన్‌ ఇండియా చిత్రం ‘డబుల్‌ ఇస్మార్ట్‌’. ‘ఇస్మార్ట్‌ శంకర్‌’ సినిమాకి సీక్వెల్‌గా రూపొందుతోంది. పూరి కనెక్ట్స్‌ సంస్థ నిర్మిస్తోంది. ఈ చిత్రం ఇటీవలే రెగ్యులర్‌ చిత్రీకరణ ప్రారంభించుకున్న సంగతి తెలిసిందే. ఇందులో ఓ కీలక పాత్రలో బాలీవుడ్‌ నటుడు సంజయ్‌ దత్‌ కనిపించనున్నారని సమాచారం. ఇప్పటికే కథా చర్చలు పూర్తయ్యాయని.. స్క్రిప్ట్‌ నచ్చడంతో సినిమా చేసేందుకు ఆయన సంసిద్ధత వ్యక్తం చేశారని తెలిసింది. ఇందులో సంజు ప్రతినాయక ఛాయలున్న పాత్ర పోషిస్తున్నట్లు ప్రచారం వినిపిస్తోంది. ఈ సినిమా చిత్రీకరణ ప్రస్తుతం ముంబయిలో శరవేగంగా జరుగుతోంది. ఇందులో భాగంగా రామ్‌పై ఓ భారీ యాక్షన్‌ సీక్వెన్స్‌ తెరకెక్కిస్తున్నారు. దీనికి స్టంట్‌ డైరెక్టర్‌ కేచ నేతృత్వం వహిస్తున్నాడు. వచ్చే వారంతో ఈ యాక్షన్‌ ఎపిసోడ్‌ పూర్తి కానున్నట్లు తెలుస్తోంది. ఈ చిత్రం వచ్చే ఏడాది మార్చి 8న ప్రేక్షకుల ముందుకు రానుంది.