Hainanna: పార్టీ ఎక్కడ జరిగినా ఈ పాటే మోగాలి

‘‘పైకి తియ్‌ లోన హాయిని.. బయట వెయ్‌ లోపలోడిని.. దాచుకోకు ఇంక దేనిని.. గోలే నీ పని’’ అంటూ చిందేస్తున్నారు కథానాయకుడు నాని. ఆయన.. మృణాల్‌ ఠాకూర్‌ జంటగా కొత్త దర్శకుడు శౌర్యువ్‌ తెరకెక్కించిన పాన్‌ ఇండియా చిత్రం ‘హాయ్‌ నాన్న’. మోహన్‌ చెరుకూరి, విజేందర్‌ రెడ్డి తీగల సంయుక్తంగా నిర్మించారు. శ్రుతిహాసన్‌ కీలక పాత్ర పోషించింది. ఈ సినిమా డిసెంబరు 7న థియేటర్లలోకి రానుంది. ఈ నేపథ్యంలోనే ఈ సినిమాలోని నాలుగో గీతాన్ని హైదరాబాద్‌లో ఓ ప్రైవేట్‌ కళాశాలలో విడుదల చేశారు. నాని, శ్రుతిహాసన్‌లపై చిత్రీకరించిన పాటిది. ‘‘ఓడీయమ్మ హీటు.. ఈడీఎంలో బీటు.. రేడియంలా లైటు’’ అంటూ సాగుతున్న ఈ గీతానికి హేషమ్‌ అబ్దుల్‌ వహాబ్‌ స్వరాలు సమకూర్చగా.. అనంత శ్రీరామ్‌ సాహిత్యమందించారు. ధృవ్‌ విక్రమ్‌, శ్రుతిహాసన్‌, చిన్మయి సంయుక్తంగా ఆలపించారు. ఈ సందర్భంగా హీరో నాని మాట్లాడుతూ.. ‘‘ఇకపై మీరు ఎక్కడికి వెళ్లినా.. పార్టీ ఎక్కడ జరిగినా ‘ఓడీయమ్మ..’ పాటే మారు మోగాలి’’ అన్నారు.