Vishal: 2026 ఎన్నికల్లో కచ్చితంగా పోటీ చేస్తా: పొలిటికల్‌ ఎంట్రీపై విశాల్‌ వ్యాఖ్యలు

చెన్నై: పొలిటికల్‌ ఎంట్రీపై నటుడు విశాల్‌ (Vishal) కీలక వ్యాఖ్యలు చేశారు. చెన్నైలో జరిగిన ఓ ప్రెస్‌మీట్‌లో పాల్గొన్న ఆయన మాట్లాడుతూ ‘‘త్వరలోనే నేను రాజకీయాల్లోకి వస్తున్నా. పార్టీని స్థాపించి 2026 తమిళనాడు అసెంబ్లీ ఎన్నికల్లో పోటీ చేస్తా. ప్రస్తుతం ప్రజలకు సరైన వసతుల్లేవు. వారికి సేవ చేసి.. అన్ని రకాల సౌకర్యాలు కల్పించాలనే ఉద్దేశంతోనే రాజకీయాల్లోకి అడుగుపెడుతున్నా’’ అని ప్రకటించారు. ‘ఏ రాజకీయ పార్టీతోనైనా పొత్తు పెట్టుకునే అవకాశం ఉందా?’ అని ప్రశ్నించగా.. ‘‘అలాంటిదేమీ లేదు. ముందు నన్ను నేను నిరూపించుకోవాలనుకుంటున్నా. ఆ తర్వాతే మిగిలిన విషయాలు, పొత్తు గురించి ఆలోచిస్తా’’ అని బదులిచ్చారు. ప్రస్తుతం ఈ వ్యాఖ్యలు తమిళనాడులో చర్చనీయాంశంగా మారాయి.