Janhvi kapoor: మోకాళ్లపై తిరుమల మెట్లెక్కిన జాన్వీకపూర్‌

ఇంటర్నెట్‌డెస్క్‌: శ్రీదేవి కుమార్తె, బాలీవుడ్‌ యువనటి జాన్వీకపూర్‌ (Janhvi Kapoor)కు దైవభక్తి మెండు. తరచూ ఆమె తిరుమల సందర్శిస్తుంటారు. తన పుట్టినరోజును పురస్కరించుకుని మార్చి 6న స్నేహితులు శిఖర్‌ పహారియా, ఒరీతో కలిసి తిరుమల స్వామి సేవలో పాల్గొన్నారు. దీనికి సంబంధించిన ఓ వీడియోను ఒరీ తాజాగా నెటిజన్లతో పంచుకున్నారు. తిరుమల టూర్‌ ఎలా జరిగిందో అందులో తెలియజేశారు.

చెన్నైలోని జాన్వీ నివాసం నుంచి కారులో మూడు గంటలు ప్రయాణించి తిరుపతి చేరుకున్నామన్నారు. అనంతరం జాన్వీ బంధువులతో కలిసి నడక దారిన తిరుమల చేరుకున్నామని తెలిపారు. ఈ క్రమంలో మోకాళ్ల మిట్ట వద్ద జాన్వీ - శిఖర్‌ మోకాళ్లపై మెట్లెక్కారు. దాదాపు 50సార్లు తాను ఇక్కడికి వచ్చానని.. ఈ దేవాలయమంటే తనకెంతో ఇష్టమని ఆమె చెప్పారు.

రామ్‌చరణ్‌ నివాసంలో జాన్వీ సందడి:

రామ్‌చరణ్‌ హీరోగా బుచ్చిబాబు తెరకెక్కిస్తోన్న చిత్రంలో జాన్వీ కపూర్‌ హీరోయిన్‌గా కనిపించనున్న విషయం తెలిసిందే. బుధవారం ఈ సినిమా అట్టహాసంగా ప్రారంభమైంది. పూజా కార్యక్రమం అనంతరం జాన్వీకపూర్‌, ఆమె తండ్రి బోనీ కపూర్‌, ఇతర చిత్రబృందం రామ్‌చరణ్‌ నివాసంలో సందడి చేశారు. చరణ్‌తో సరదాగా మాట్లాడారు. దీనికి సంబంధించిన ఫొటోలను జాన్వీ ఇన్‌స్టాలో షేర్‌ చేశారు.