Janhvi Kapoor: సూర్యకు జోడీగా జాన్వీకపూర్‌..?

ఇంటర్నెట్‌డెస్క్‌: బాలీవుడ్‌ దర్శకుడు రాకేశ్‌ ఓంప్రకాశ్‌ మిశ్రా ప్రతిష్ఠాత్మకంగా తెరకెక్కించనున్న ప్రాజెక్ట్‌ ‘కర్ణ’ (Karna). మహాభారతంలోని కర్ణుడి పాత్రను ఆధారంగా చేసుకుని దీనిని తీర్చిదిద్దనున్నట్లు వార్తలు వస్తున్నాయి. సూర్య (Suriya) హీరోగా నటించనున్నారు. ప్రస్తుతం ప్రీ ప్రొడక్షన్‌ పనులు జరుగుతున్నాయి. తాజాగా ఈ ప్రాజెక్ట్‌కు సంబంధించి ఓ ఆసక్తికర విషయం నెట్టింట వైరల్‌గా మారింది. శ్రీదేవి కుమార్తె, నటి జాన్వీకపూర్‌ (Janhvi Kapoor) ఇందులో కథానాయికగా కనిపించనున్నట్లు తెలుస్తోంది. ఈ మేరకు చిత్రబృందం ఇప్పటికే ఆమెను సంప్రదించారని బాలీవుడ్‌లో వార్తలు చక్కర్లు కొడుతున్నాయి. దీనిపై చిత్రబృందం నుంచి కానీ, నటి టీమ్‌ నుంచి కానీ ఎలాంటి అధికారిక ప్రకటన వెలువడలేదు.

పాన్‌ ఇండియా స్థాయిలో ఈ సినిమా రూపుదిద్దుకోనుంది. రెండు భాగాల్లో విడుదల కానుంది. ఫర్హాన్‌ అక్తర్‌ నిర్మాతగా వ్యవహరిస్తున్నారు. బాలీవుడ్‌ నటుడు షాహిద్‌కపూర్‌తో ఈ ప్రాజెక్ట్‌ చేయాలని రాకేశ్‌ భావించారు. అనుకోని కారణాలతో వైదొలగారు.