Jr NTR: ఎన్టీఆర్‌-ధనుష్‌-వెట్రిమారన్‌ మూవీ నిజమేనా? తారక్‌ టీమ్‌ ఏం చెప్పిందంటే?

హైదరాబాద్‌: ఎన్టీఆర్‌ (NTR), ధనుష్‌ (dhanush) కథానాయకులుగా తమిళ దర్శకుడు వెట్రిమారన్‌ ఓ పాన్‌ ఇండియా మూవీని చేస్తున్నారని గత కొద్ది రోజులుగా వార్తలు చక్కర్లు కొడుతున్న సంగతి తెలిసిందే. గత రెండు రోజులుగా సోషల్‌మీడియాలో ఈ వార్త విపరీతంగా ట్రెండ్‌ అవుతోంది. అధికారికంగా ప్రకటించడమే తరువాయి అంటూ పలు వెబ్‌సైట్‌లు సైతం రాసుకొచ్చాయి. ఈ క్రమంలో తాజా వార్తలపై ఎన్టీఆర్‌ టీమ్‌ స్పందించింది. అవన్నీ ఆధారాల్లేని వార్తలని, అవాస్తవాలని స్పష్టం చేసింది. ఈ మేరకు ప్రకటన కూడా విడుదల చేశారు.

‘‘ఎన్టీఆర్‌, ధనుష్‌, వెట్రిమారన్‌లు కలిసి సినిమా చేస్తున్నారని, గత రెండు, మూడు రోజులుగా కొన్ని అనధికార వార్తలు హల్‌చల్‌ చేస్తున్నాయి. ఆ వార్తలన్నీ అవాస్తవం. దయచేసి ఆ ఊహాగానాలను నమ్మొద్దు’’ అని పేర్కొంది. ఇక ఈ సినిమా పాన్‌ ఇండియా మూవీ అని, రెండు భాగాలుగా వస్తుందని కూడా కొందరు రాసుకొచ్చారు.

ప్రస్తుతం కొరటాల శివ దర్శకత్వంలో ఎన్టీఆర్‌ నటిస్తున్నారు. జాన్వీకపూర్ కథానాయిక. ‘NTR30’ వర్కింగ్‌ టైటిల్‌తో రూపొందుతున్న ఈ సినిమాతోనే జాన్వీ తెలుగు ఇండస్ట్రీలోకి అడుగు పెడుతున్నారు. ప్రస్తుతం ఎన్టీఆర్‌ ఆస్కార్‌ అవార్డుల వేడుకలో పాల్గొనేందుకు లాస్‌ ఏంజిల్స్ వెళ్లారు. అక్కడి నుంచి తిరిగి వచ్చిన తర్వాత కొరటాల మూవీ షూటింగ్‌ పాల్గొంటారు. దీని తర్వాత ప్రశాంత్‌నీల్‌ దర్శకత్వంలో ఓ మూవీని చేస్తారు. పాన్‌ ఇండియా మూవీగా ఇది తెరకెక్కనుంది. మరోవైపు విజయ్‌సేతుపతితో వెట్రిమారన్‌ ఓ సినిమా చేస్తున్నారు. దీని తర్వాత సూర్యతో ‘వాడివసల్‌’ చేస్తారు. ఇక ధనుష్‌ ఇటీవల ‘సార్‌’తో మంచి విజయాన్ని అందుకోగా, ప్రస్తుతం అరుణ్‌ మాథేశ్వరన్‌ దర్శకత్వంలో ‘కెప్టెన్‌ మిల్లర్‌’ మూవీ చేస్తుండగా, దీని తర్వాత శేఖర్‌ కమ్ములతో ఓ సినిమా చేయనున్నారు.