Jyothika: సూర్య విషయంలో.. అందుకు గర్వపడతా: జ్యోతిక

ఇంటర్నెట్‌ డెస్క్‌: తన భర్త, ప్రముఖ నటుడు సూర్య (Suriya)పై నటి జ్యోతిక (Jyothika) ప్రశంసలు కురిపించారు. మహిళా పాత్రలకు ప్రాధాన్యం ఉండే స్క్రిప్టులను ఆయన ఎక్కువగా ఎంపిక చేసుకుంటారని, అందుకు తానెప్పుడూ గర్వపడతానని అన్నారు. తన కొత్త సినిమా ‘షైతాన్‌’ (Shaitaan) ప్రచారంలో భాగంగా ఓ ఇంటర్వ్యూలో సూర్య గురించి మాట్లాడారు. ‘‘సూర్య సినిమాల్లో ఏ మహిళా పాత్ర కించపరిచేలా ఉండదు. ఫిమేల్‌ క్యారెక్టర్లు ఉన్నతంగా ఉండేలా చూసుకుంటారు. స్టోరీ డిమాండ్‌ చేస్తే తన పాత్ర కన్నా విమెన్‌ రోల్‌కు నిడివి ఎక్కువ ఉన్నా ఆయన పట్టించుకోరు. ఇందుకు ‘జై భీమ్‌’ సినిమా ఓ ఉదాహరణ’’ అని పేర్కొన్నారు.

‘షైతాన్‌’తో రెండు దశాబ్దాల తర్వాత బాలీవుడ్‌లోకి రీ ఎంట్రీ ఇచ్చారు జ్యోతిక. వికాస్‌ భల్‌ దర్శకత్వం వహించిన ఈ హారర్‌ ఫిల్మ్‌లో అజయ్‌ దేవ్‌గణ్‌ (Ajay Devgn), మాధవన్‌ (Madhavan) హీరోలుగా నటించారు. మార్చి 8న థియేటర్లలో విడుదలైన ఈ సినిమా పాజిటివ్‌ టాక్‌ సొంతం చేసుకుంది. సూర్య ప్రస్తుతం ‘కంగువా’తో బిజీగా ఉన్నారు. శివ దర్శకుడు. దిశా పటానీ కథానాయికగా నటించగా బాబీ దేవోల్‌ కీలక పాత్ర పోషించారు. కంగ అనే ఓ పరాక్రముడి కథతో భారీ బడ్జెట్‌తో రూపొందుతున్న ఈ సినిమా త్వరలోనే ప్రేక్షకుల ముందుకు రానుంది.