Kaatera: ఓటీటీలోకి కన్నడ బ్లాక్‌బస్టర్‌.. స్ట్రీమింగ్‌ ఎక్కడంటే..?

ఇంటర్నెట్‌డెస్క్‌: కన్నడ నటుడు దర్శన్‌ (Darshan) ప్రధాన పాత్ర పోషించిన చిత్రం ‘కాటేరా’ (Kaatera). యాక్షన్‌ డ్రామా నేపథ్యంలో తెరకెక్కిన ఈ సినిమాకు తరుణ్‌ సుధీర్‌ దర్శకత్వం వహించారు. గతేడాది డిసెంబర్‌ 29న ఇది విడుదలైంది. కన్నడలో ఈ చిత్రం బాక్సాఫీస్‌ వద్ద ఘన విజయాన్ని అందుకుంది. దాదాపు రూ.100 కోట్లు వసూలు చేసినట్లు అంచనా. ఇప్పటికే ఈ సినిమా జీ5 ఓటీటీ వేదికగా స్ట్రీమింగ్‌ అవుతుంది. తాజాగా తెలుగు, తమిళ వెర్షన్‌ స్ట్రీమింగ్‌కు వచ్చాయి. ఈ విషయాన్ని తెలియజేస్తూ జీ5 సామాజిక మాధ్యమాల్లో పోస్ట్ పెట్టింది. ఈ మేరకు ఆదివారం నుంచి ‘కాటేరా’ తెలుగు, తమిళ ప్రేక్షకులకు అందుబాటులోకి వచ్చింది.

1970లో కర్ణాటకలోని ఓ గ్రామంలో జరిగిన వాస్తవ సంఘటనలను ఆధారంగా చేసుకుని ‘కాటేరా’ చిత్రాన్ని తెరకెక్కించారు. మాలాశ్రీ కుమార్తె ఆరాధన రామ్‌ కథానాయికగా తెరంగేట్రం చేశారు. కాటేరాగా దర్శన్‌ యాక్టింగ్‌కు కన్నడ ప్రేక్షకులు ఫిదా అయ్యారు. కథ, కథనం చక్కగా కుదరడంతో ఇది విజయాన్ని అందుకుంది.