Kareena Kapoor: వరుస పరాజయాలతో నిద్రలేని రాత్రులు.. నేను కాబట్టి తట్టుకోగలిగా: స్టార్‌ హీరోయిన్‌

ఇంటర్నెట్‌డెస్క్‌: ‘క్రూ’(Crew)తో ప్రేక్షకులను అలరించేందుకు సిద్ధమయ్యారు నటి కరీనాకపూర్‌ (Kareena Kapoor). ఈ సినిమా ప్రమోషన్స్‌లో భాగంగా తాజాగా ఆమె ఓ ఇంటర్వ్యూలో పాల్గొన్నారు. ఇన్నేళ్ల సినీ కెరీర్‌లో తాను ఎలాంటి విషయాలు తెలుసుకున్నానన్నది చెప్పారు. ముఖ్యంగా వరుస పరాజయాలు అందుకోవడంపై ఆసక్తికర వ్యాఖ్యలు చేశారు.

‘‘నటిగా నా ప్రయాణం మొదలై దాదాపు పాతికేళ్లు అవుతుంది. ఎన్నో ఎత్తుపల్లాలు చూశా. నా కెరీర్‌లో విజయాల కంటే పరాజయాలు ఎక్కువగా ఉన్నాయి. ముఖ్యంగా ‘జబ్‌ వి మెట్‌’ కంటే ముందు నా సినిమాలు చాలావరకూ బాక్సాఫీస్‌ వద్ద ఫ్లాప్‌ అయ్యాయి. ఆ సమయంలో నేనెంతో బాధపడ్డా. ‘‘నా సినిమాలు ఎందుకు ఆడటం లేదు? అసలు సమస్య ఎక్కడ ఉంది?’’ అని ఆలోచిస్తూ ఏడ్చా. నిద్రలేని రాత్రులు గడిపా. నా సినిమాలు చూసిన వాళ్లందరూ.. నేను బాగున్నానని కామెంట్‌ చేశారు. కానీ, ఆశించిన విజయాన్ని మాత్రం అందుకోలేకపోయా. విజయాల కంటే కూడా పరాజయాల వల్లే అందరికీ తెలిశానని భావిస్తుంటా’’

‘‘కథల ఎంపిక విషయంలో ప్రత్యేకించి పలు అంశాలను పరిగణలోకి తీసుకునేదాన్ని కాదు. వచ్చిన ప్రతీ కథను అంగీకరించేదాన్ని. అన్ని చిత్రాల్లో నటించేదాన్ని. ఆయా చిత్రాల వల్ల ఎలాంటి ఫలితాలు ఉంటాయని ఆలోచించలేదు. నేను కాబట్టి వరుస పరాజయాలు తట్టుకోగలిగా. వేరేవాళ్లు అయితే దీనిని జీర్ణించుకోలేకపోయేవారు’’ అని ఆమె అన్నారు. 2000లో విడుదలైన ‘రెఫ్యూజీ’తో కరీనా నటిగా ఎంట్రీ ఇచ్చారు. 2007లో వచ్చిన ‘జబ్‌ వి మెట్‌’ ఘన విజయాన్ని అందుకుంది. ఆమె నటనకు మంచి పేరు వచ్చింది.