krithi shetty: టీజర్‌ వచ్చేది ఆ రోజే?

‘ఉప్పెన’లా తెలుగు సినీ ప్రేక్షకుల ప్రేమను పొందింది కథానాయిక కృతి శెట్టి. ‘సూపర్‌ 30’తో చిత్రపరిశ్రమలో అడుగుపెట్టిన ఈ భామ తెలుగు, తమిళ, మలయాళ భాషల్లో రాణిస్తూ మంచి క్రేజ్‌ని సొంతం చేసుకుంటోంది. ప్రస్తుతం ఈమె..నటుడు, దర్శకుడు విఘ్నేశ్‌ శివన్‌ దర్శకత్వంలో నటిస్తున్న చిత్రం ‘ఎల్‌ఐసీ’(లవ్‌ ఇన్సూరెన్స్‌ కార్పొరేషన్‌). ప్రదీప్‌ రంగనాథన్‌ కథానాయకుడు. తాజాగా ఈ చిత్ర టీజర్‌ను ఈ నెల 14న విడుదల చేయనున్నట్లు తెలుస్తోంది. ‘ఇటీవలే సింగపూర్‌లో ఓ షెడ్యూల్‌ని పూర్తిచేసుకుంది చిత్రబృందం. ఆ రోజు తమిళ నూతన సంవత్సరం కాబట్టి అదే రోజు టీజర్‌ను విడుదల చేసేందుకు చిత్రబృందం ఆసక్తి కనబరుస్తోంది’ అంటూ సన్నిహిత వర్గాలు తెలిపాయి. ఈ సినిమాలో ప్రదీప్‌కి సోదరిగా నయనతారని ఎంపిక చేసినట్లు అప్పట్లో వార్తలు వచ్చాయి. ఆ విషయంలో ఇప్పటి వరకూ ఎలాంటి అధికారిక ప్రకటన వెలువడలేదు. చిత్ర టైటిల్‌ విషయంలోనూ కొన్ని వివాదాలు తలెత్తాయి. ‘మనమే’, ‘జీనీ’ సినిమాలతో బిజీగా ఉంది కృతి..