lokesh kanagaraj: ‘తలైవా171’ అప్‌డేట్‌ ఇచ్చిన దర్శకుడు లోకేశ్‌ కనగరాజ్‌

ఇంటర్నెట్‌ డెస్క్‌: దర్శకుడు లోకేశ్‌ కనగరాజ్‌ (lokesh kanagaraj) ‘ఇనిమేల్‌’ మ్యూజిక్‌ ఆల్బమ్‌తో నటుడిగా పరిచయమయ్యారు. ఇందులో శృతిహాసన్‌ పాటను ఆలపించడంతో పాటు నటించారు. ప్రముఖ కథానాయకుడు కమల్‌హాసన్‌ లిరిక్స్‌ అందించారు. ఈ పాట మార్చి 25న విడుదలైంది. ఈ క్రమంలో లోకేశ్‌ కనగరాజ్‌ మీడియాతో మాట్లాడుతూ రజనీకాంత్‌తో తాను చేయబోయే సినిమా గురించి తెలిపారు. ‘‘రజనీకాంత్‌తో కలసి వర్క్‌ చేయడానికి ఆసక్తిగా ఎదురుచూస్తున్నా. ‘తలైవా171’ (Thalaivar 171) నాకెంతో ప్రత్యేకమైనది. షూటింగ్‌ మొదలుపెట్టడానికి, ప్రీప్రొడక్షన్ వర్క్‌ పూర్తి చేయడానికి కొంత సమయం పడుతుంది. జూన్‌లో ఈ సినిమా సెట్స్‌పైకి వెళ్లే అవకాశాలున్నాయి. సంవత్సరంన్నరలో ఈ సినిమా పూర్తి చేసి, ఆ తర్వాత నెల రోజులకు కార్తి ‘ఖైదీ-2’ మొదలుపెడతాను. ప్రస్తుతం రజనీకాంత్‌ నటిస్తోన్న చిత్రం విడుదల తర్వాత దీనికి సంబంధించిన అధికారిక ప్రకటన వెల్లడిస్తాను’’ అని  కనగరాజ్‌ పేర్కొన్నారు. ‘తలైవా 171’ చిత్రానికి అనిరుధ్‌ సంగీతం అందించనున్నారు. ఇందులో శివకార్తికేయన్‌ కీలక పాత్రలో నటించనున్నారు.

రజనీకాంత్‌(Rajinikanth) టి.జి.జ్ఞానవేల్‌ దర్శకత్వంలో నటిస్తున్నారు. ‘వెట్టయాన్‌’ తెలుగులో ‘వేటగాడు’ పేరుతో ప్రేక్షకుల ముందుకురానుంది. ఇందులో అమితాబ్‌, ఫహద్‌ ఫాజిల్‌, రానా, మంజు వారియర్‌, రితికాసింగ్‌, దుషారా విజయన్‌ కీలకపాత్రలు పోషిస్తున్నారు. ప్రస్తుతం ఈ సినిమా చిత్రీకరణ శరవేగంగా జరుగుతోంది.