Maidaan: మైదానంలోకి దిగే ముహుర్తం ఖరారు

జాతీయ ఉత్తమ నటుడు అజయ్‌ దేవ్‌గణ్‌ (Ajay Devgn) కథానాయకుడిగా తెరకెక్కుతున్న స్పోర్ట్స్‌ డ్రామా చిత్రం ‘మైదాన్‌’ (Maidaan). 1950 నుంచి 1963 వరకు భారత ఫుట్‌బాల్‌ జట్టుకి కోచ్‌, మేనేజర్‌గా ఉంటూ సర్వస్వం ధారపోసిన సయ్యద్‌ అబ్దుల్‌ రహీం జీవితం ఆధారంగా రూపొందించారు. ఎన్నోసార్లు వాయిదా పడుతూ వస్తున్న ఈ సినిమా విడుదల తేదీని సినీవర్గాలు ఎట్టకేలకు శనివారం ఖరారు చేశాయి. ఎట్టకేలకు వచ్చే ఏడాది ఫిబ్రవరి 17న ఇది ప్రేక్షకుల ముందుకు రానుంది. ఈ సందర్భంగా అజయ్‌ దేవ్‌గణ్‌ ‘మరుగున పడిపోయిన ఒక నిజమైన హీరో సయ్యద్‌ అబ్దుల్‌ రహీం జీవిత చరిత్రే ఈ సినిమా. ఆయన ఇండియాకి, భారతీయ ఫుట్‌బాల్‌ జట్టుకి స్వర్ణయుగం తీసుకొచ్చారు’ అంటూ ట్వీట్‌ చేశారు. ‘బధాయీ హో’ ఫేం అమిత్‌ రవీంద్రనాథ్‌శర్మ దర్శకుడు. ప్రియమణి, గజ్‌రాజ్‌ రావు, రుద్రనీల్‌ ఘోష్‌ కీలక పాత్రల్లో నటిస్తున్నారు. ఆకాష్‌ చావ్లా, అరుణవ జాయ్‌ సేన్‌గుప్తా నిర్మిస్తున్నారు.