Prabhas: ప్రభాస్‌ గురించి ఒక్క మాటలో చెప్పి ఫ్యాన్స్‌ మనసు దోచేసిన నటి

హైదరాబాద్‌: తెలుగు పరిశ్రమలోకి అడుగుపెడుతున్నందుకు చాలా ఆనందంగా ఉందని హీరోయిన్‌ మాళవిక మోహనన్‌ (Malavika Mohanan) అన్నారు. ఎప్పుడూ సోషల్‌ మీడియాలో యాక్టివ్‌గా ఉండే ఈ నటి తాజాగా ట్విటర్‌లో అభిమానులతో ముచ్చటించారు. ఈ సందర్భంగా ఫ్యాన్స్‌ అడిగిన ప్రశ్నలకు సరదాగా సమాధానం చెప్పారు. అందులో భాగంగా ఓ అభిమాని ప్రభాస్‌ (Prabhas) గురించి ఒక్క మాటలో చెప్పమని అడగ్గా.. మాళవిక చెప్పిన సమాధానం రెబల్‌ స్టార్‌ ఫ్యాన్స్‌ను ఆకట్టుకుంది.

మారుతీ - ప్రభాస్‌ల సినిమా గురించి మాట్లాడిన మాళవిక.. ‘ఈ మూవీతో టాలీవుడ్‌లోకి వస్తున్నందుకు చాలా ఆనందంగా ఉంది. ఇందులోని సన్నివేశాలు అద్భుతంగా వచ్చాయి. చిత్రబృందం ఈ షెడ్యూల్స్‌ గురించి అధికారికంగా ప్రకటించే వరకు వేచి ఉండాలి. తెలుగు ప్రేక్షకులను అలరించేందుకు నేను చాలా ఆసక్తిగా ఉన్నాను’ అని చెప్పారు. ప్రభాస్‌ గురించి ఒక్క మాటలో చెప్పమని అడగ్గా.. ‘తనకు ఎవరైనా ఆకర్షితులవుతారు’ అని చెప్పారు. దీంతో ప్రభాస్‌ అభిమానులు తెగ ఖుష్‌ అవుతున్నారు. ఇక మారుతీ దర్శకత్వంలో ప్రభాస్‌ నటిస్తోన్న ఈ చిత్రం హారర్‌ కామెడీగా ప్రేక్షకుల ముందుకు రానుంది. ఈ సినిమాలో ప్రభాస్‌కు జోడిగా ముగ్గురు కథానాయికలు నటిస్తున్నారు. మాళవిక మోహనన్‌తో పాటు నిధి అగర్వాల్‌,  రిద్ది కుమార్‌ కీలకపాత్రలో నటిస్తున్నారు. ‘రాజా డీలక్స్‌’ పేరుతో ఇది ప్రచారంలో ఉంది. మరోవైపు ప్రభాస్‌ నటిస్తోన్న ‘ఆదిపురుష్‌’ విడుదలకు సిద్ధమవుతోంది. వీటితో పాటు ‘సలార్‌’, ‘ప్రాజెక్ట్‌ - కె’ షూటింగ్‌లతో బిజీగా ఉన్నాడు.