Mama Mascheendra: అరుదైన చిత్రం.. మామా మశ్చీంద్ర

‘నా సినీ ప్రయాణంలో నేను చేసిన వైవిధ్యమైన సినిమా ఇదే... ప్రతి పాత్రకీ ప్రేక్షకులు కనెక్ట్‌ అవుతార’న్నారు సుధీర్‌బాబు. ఆయన కథానాయకుడిగా నటించిన చిత్రం ‘మామా మశ్చీంద్ర’. మృణాళిని రవి, ఈషారెబ్బా కథానాయికలు. హర్షవర్ధన్‌ దర్శకత్వం వహించారు. శ్రీ వెంకటేశ్వర సినిమాస్‌ పతాకంపై సునీల్‌ నారంగ్‌, పుస్కూర్‌ రామ్మోహన్‌రావు నిర్మిస్తున్నారు. అక్టోబరు 6న ప్రేక్షకుల ముందుకు వస్తున్న ఈ సినిమా ట్రైలర్‌ని ప్రముఖ కథానాయకుడు మహేశ్‌బాబు బుధవారం విడుదల చేశారు. ఈ సందర్భంగా చిత్రబృందం హైదరాబాద్‌లో విలేకర్ల సమావేశాన్ని నిర్వహించింది. సుధీర్‌బాబు మాట్లాడుతూ ‘‘కంటెంట్‌ ఉన్న కమర్షియల్‌ సినిమా ఇది. కొత్త రకమైన కథని, అంతే కొత్తగా తీశారని ప్రేక్షకులు మెచ్చుకుంటారు. ఇందులో అన్ని రకాల అంశాలు, జోనర్స్‌ ఉంటాయి. మృణాళిని, ఈషా రెబ్బా చాలా బాగా నటించారు. హర్షవర్ధన్‌ రచనకి నేను  అభిమానిని. ‘మనం’ చూసినప్పుడు అరుదైన సినిమాగా ఎలా అస్వాదించామో, అలాంటి అనుభూతిని పంచుతుంది. దుర్గ, పరశురాం, డీజే పాత్రల్లో త్రిపాత్రాభినయం చేశా. నా చిన్నప్పటి సన్నివేశాల్లో మా అబ్బాయి నటించాడు’’ అన్నారు. దర్శకుడు మాట్లాడుతూ ‘‘పాతికేళ్లుగా నేనెలాంటి మలుపు కోసం ఎదురు చూస్తున్నానో అది ఈ సినిమాతో దక్కబోతోంద’’న్నారు.