Mani Ratnam: కమల్‌ హాసన్‌తో మరో సినిమా అందుకే 37 ఏళ్లు పట్టింది: మణిరత్నం

ఇంటర్నెట్‌ డెస్క్‌: కమల్‌ హాసన్‌ (Kamal Haasan) లాంటి అగ్ర హీరోతో సినిమా తీయాలంటే ఆయన స్థాయికి తగిన కథ ఉండాలని దర్శకుడు మణిరత్నం అన్నారు. వీళ్లిద్దరి కాంబినేషన్‌లో 37 ఏళ్ల తర్వాత ‘థగ్‌లైఫ్‌’ (ThugLife) అనే సినిమా తెరకెక్కుతున్న సంగతి తెలిసిందే. భారీ మల్టీస్టారర్‌గా ఇది రానుంది. తాజాగా ఓ అవార్డు వేడుకలో పాల్గొన్న మణిరత్నం దీని గురించి మాట్లాడారు.

‘‘కమల్ హాసన్‌తో మరో సినిమా తీసేందుకు 37ఏళ్లు పట్టింది. ఇండస్ట్రీలో మల్టీ టాలెంటెడ్‌ నటుల్లో ఆయన ఒకరు. చిన్న కథలను ఆయనతో తీయకూడదు. తన స్థాయికి తగిన కథ ఉన్నప్పుడు మాత్రమే ఆయన్ని సంప్రదించాలి. ఇప్పుడు మేము ‘థగ్‌లైఫ్‌’తో మరోసారి చరిత్ర సృష్టించనున్నాం. కొన్ని కథలకు కొత్తవాళ్లు అయితేనే బాగుంటుంది. అందుకే కొత్త హీరోలతో సినిమాలు చేస్తాం. నేను ఎవరినీ ఇండస్ట్రీకి పరిచయం చేయాలని సినిమాలు చేయలేదు. నా కథకు అవసరం కాబట్టే కొత్త వారికి అవకాశమిచ్చాను’ అని తెలిపారు.

ఇదే కార్యక్రమంలో పాల్గొన్న షారుక్‌ఖాన్‌కు మణిరత్నంకు మధ్య జరిగిన సరదా సంభాషణ సోషల్ మీడియాలో ప్రస్తుతం నవ్వులు పూయిస్తోంది. ‘‘దిల్‌ సే’ తర్వాత నాతో మరో సినిమా చేయాలని మణిరత్నంను ఎన్నోసార్లు వేడుకొన్నాను. కానీ, ఆయన ఇంత వరకు నాకు ఏ విషయం చెప్పలేదు. ఆయన ఓకే అంటే ఈసారి ట్రైన్‌పై కాదు.. విమానంపైన కూడా ‘చయ్యా చయ్యా’ పాటకు డ్యాన్స్‌ చేస్తా’ అని షారుక్‌ చెప్పారు. దీనికి మణిరత్నం సరదాగా స్పందించారు.. ‘నువ్వు విమానం కొన్న తర్వాత ప్లాన్ చేద్దాం’ అన్నారు. వెంటనే కొనేద్దామంటూ షారుక్‌ నవ్వుతూ సమాధానమిచ్చారు.